काठमाडौं । प्रमुख प्रतिपक्षी नेपाली कांग्रेसले प्रधानमन्त्री केपि शर्मा ओली राजामहाराजाले जसरी जन्मोत्सव मनाउन व्यस्त रहेको बताएको छ ।
मंगलबार प्रतिनिधिसभाको बैठकमा बोल्दै कांग्रेस सांसद मीनेन्द्र रिजालले ‘प्रधानमन्त्री कुन लोकमा हुनुहुन्छ थाहा छैन। तर जनता तपाईंको सत्ताउन्माद देखेर निराश छन् प्रधानमन्त्रीज्यू,’ भन्दै प्रश्न खडा गरेका हुन्।
यस्तै नेता रिजालले तत्कालीन सञ्चारमन्त्री गोकुलप्रसाद बाँस्कोटाले सेक्युरिटी प्रिन्टिङ प्रेसमा ७० करोड कमिसनका लागि गरेको मोलमोलाइ, नेपाल ट्रष्टको जग्गा मनलाग्दी रूपमा यति कम्पनीलाई दिने र बालुवाटार जग्गा प्रकरणमा अख्तियार दुरूपयोग अनुसन्धान आयोगलाई प्रभावित पार्ने काम लाजमर्दा भएको बताए हुन्।
‘कमिसन धेरै आउने नाममा मन्त्रीले ठेक्का रकम बढाएको सुनिन्छ। सञ्चार मन्त्रालयमै खर्बौंका ठेक्का थिए। अप्टिकल फाइबर, थ्रीजी, फोरजी, स्याटेलाइट सबैमा भ्रष्टाचार छ,’ रिजालले भने,‘त्यही भएर अरू सबै तुलोको एकातिर गोकुल बाँस्कोटा एक्लै अर्कातिर भनेको होला।’
आजको बैठक सुरू हुनासाथ कांग्रेस सांसदहरू उठेका थिए।
‘आज पनि केही छ र ?’ भन्दै सभामुख अग्निप्रसाद सापकोटाले रिजाललाई बोल्न दिएका थिए।
