काठमाडौं । दोस्रो संस्करणको नेपाल प्रीमियर लिग (एनपीएल) अन्तरगत साविक उपविजेता सुदूरपश्चिम रोयल्सले साविक विजेता जनकपुर बोल्ट्सलाई पराजित गरेको छ ।
भर्खरै सम्पन्न खेलमा सुदूरपश्चिमले जनकपुरलाई ६ विकेटले हराएको हो ।
१४६ रनको लक्ष्य सुदूरपश्चिमले १७।४ ओभरमा ४ विकेटको क्षतिमा भेट्टायो ।
उसका लागि इशान पाण्डेले अर्धशतकीय पारी खेले । ३५ बल खेलेका उनले ८ चौका र १ छक्काको मद्दतले ५२ रन जोडे । यस्तै विनोद भण्डारीले ४२, हरमित सिंहले २५ रनको योगदान दिए । दिपेन्द्र सिंह ऐरी १० रनमा अविजित रहे ।
वलिङतर्फ जनकपुरका माज सदाकतले दुई तथा सञ्जय कृष्णमुर्ति र आदित्य महताले एक एक विकेट लिए ।
त्यसअघि टस जितेर ब्याटिङमा उत्रिएको जनकपुरले २० ओभरमा ८ विकेटको क्षतिमा १४५ रन जोड्यो ।
उसका लागि सञ्जय कृष्णमुर्तिले अर्धशतक बनाए । उनले ३८ बलमा ५० रन जोडे । यस्तै, जान इटोनले ३९, आदित्य महाताले १५, वायन पर्नेलले १४ तथा माज सदाकतले १२ रन जोडे ।
वलिङतर्फ सुदूरपश्चिमका अविनाश बोहराले चार स्कट कुगलाइन तीन तथा दिपेन्द्र सिंह ऐरीले एक विकेट लिए ।
लगातार चौंथो हार ब्यहोरेको जनकपुर प्लेअफको दौडबाट बाहिरिने संघारमा पुगेको छ । अङ्कविहिन जनकपुर तालिकाको पुछारमा रहेको छ ।
यता अपराजित रहेको सुदूरपश्चिम भने पाँचवटै खेल जितेर अङ्क तालिकाको पहिलो स्थानमा यथावत छ ।
आजको खेल जितेसँगै सुदूरपश्चिमले ‘प्लेअफमा स्थान सुरक्षित गरेको छ ।
आजै भएको पहिलो खेलमा लुम्बिनीसँग पोखरा पराजित भएको थियो।
