वाशिङ्टन । कोरोना भाइरसको प्रकोप देखा परेपछि अमेरिकाको क्यालिफोर्निया राज्यमा संकटकालको घोषणा गरिएको समाचार छ । अमेरिकी सञ्चार माध्यमहरुले मेरिल्याण्डमा तीन जनामा यो भाइरसको संक्रमण देखिएको छ । मेरिल्याण्डका गभर्नर ल्यारी हेगनले यहाँ ३१ जनाको स्वास्थ्य परीक्षण गरिएको र तीमध्ये ३ जनामा कोरोना भाइरसको संक्रमण देखिएको पुष्टी गरे । यहाँका स्थानीय सञ्चारमाध्यमहरुले पनि यो समाचारको पुष्टी गरेका छन् । ती संकास्पद व्यक्तिमा गरिएको परीक्षणमा ३ जनामा पोजेटिभ देखिएको छ भने अरु १७ जनामा सामान्य रुघोखोकी देखिएको हो । त्यसैगरी अरु ११ जना संकास्पद विरामीको भने उपाचार जारी रहेको बताइएको छ ।
गभर्नर हेगनले बिहीबार पत्रकार सम्मेलन गरेर बाल्टिमोरमा गरिएको स्वास्थ्य परीक्षणमा तीनजनामा कोरोना पोजेटिभ रिपोर्ट देखिएको घोषणा गरेका हुन् । ती संक्रमितहरु विदेश भ्रमणबाट आएको बताइएको छ । संक्रमित हुनेमा एकजना ५० वर्षका पुरुष र अरु दुईजना दम्पत्ति हुन् । राज्यमा कोरोना भाइरसको संक्रमण देखिएपछि मेरिल्याण्ड राज्यमा संकटकाल घोषणा गरिएको छ । अमेरिकामा यसअघि पनि कोरोनाको संक्रमण देखिसकेको छ । तर यहाँ एकैपटक यतिधेरैमा पोजेटिभ देखिएपछि संकटकाल नै लगाउनुपरेको बताइएको छ । प्राप्त पछिल्लो समाचारअनुसार अमेरिकामा कम्तिमा ९ जनाको यो भाइरसका कारण मृत्यु भइसकेको छ । यसैबीच अमेरिकाको क्यालिफोर्निया राज्यमा भने संकटकाल घोषणा गरिएको छ । त्यहाँ सबैभन्दा पहिला एक ७१ वर्षीयको ज्यान गएको थियो ।
चीनको वुहानबाट फैलिएको यो भाइरस हाल विश्वका करिब ८० देशमा फैलिएको छ । यो भाइरसको संक्रमण भएपछि खासगरी ज्वरो आउने, घाँटी दुख्ने तथा स्वास फेर्न गाह्रो हुने जस्ता लक्षणहरु देखिन्छन् । अहिलेसम्म विश्वमा यो संक्रमणबाट ३ हजार ३०० भन्दा बढीको ज्यान गइसकेको छ । चीनमा मात्र यसबाट ३ हजार भन्दा बढीको ज्यान गएको छ । त्यसैगरी इटाली, इरान, दक्षिण कोरियामा पनि यसबाट नागरिकको ज्यान गएको छ ।
