काठमाडौँ । दक्षिण अफ्रिकाले गुवाहाटी टेस्टमा भारतलाई ४०८ रनले पराजित गरेको छ । टिमले यसअघि कोलकातामा भएको टेस्टमा पनि भारतलाई ३० रनले हराएको थियो।
यससँगै दक्षिण अफ्रिकाले २५ वर्षपछि भारतलाई उसको घरमै क्लिन स्वीप गर्यो। यसअघि २००० मा दुई टेस्टको सिरिज २–० ले जितेको थियो।
बुधवार बारसापारा स्टेडियममा ५४९ रनको लक्ष्य पछ्याउँदै भारत १४० रनमै समेटियो। भारतका लागि दोस्रो इनिङ्समा रवीन्द्र जडेजाले सबैभन्दा धेरै ५४ रन बनाए। दक्षिण अफ्रिकाका साइमन हार्मरले ६ विकेट लिए।
दक्षिण अफ्रिकाले चौथो दिन मंगलबार आफ्नो दोस्रो इनिङ्स २६०–५ मा घोषण गरेको थियो। दक्षिण अफ्रिकाले टस जितेर पहिलो इनिङ्समा ४८९ रन बनाएको थियो। जवाफमा भारत २०१ रनमै समेटिएको थियो। यसरी भारतलाई जित्न ५४९ रनको लक्ष्य मिलेको थियो।
साइमन हार्मर सिरिजका उत्कृष्ट खेलाडी
दक्षिण अफ्रिकी स्पिनर साइमन हार्मरलाई प्लेयर अफ द सिरिज घोषित गरियो। उनले दुई टेस्टको सिरिजमा १७ विकेट लिए। तेज बलर मार्को यान्सनलाई प्लेयर अफ द म्याच दिइयो। उनले पहिलो इनिङ्समा ९३ रन बनाए र ४८ रन दिएर ६ विकेट लिए। दोस्रो इनिङ्समा पनि एक विकेट हात पारे।
रनको हिसाबले भारतको सबैभन्दा ठूलो टेस्ट हार
विश्व टेस्ट च्याम्पियन दक्षिण अफ्रिकाले भारतलाई दोस्रो इनिङ्समा १४० रनमै समेटेर ४०८ रनले जित्यो। यो भारतको समग्र टेस्ट इतिहासमै र घरमै रनको आधारमा सबैभन्दा ठूलो हार हो। यसअघि २००४ मा अष्ट्रेलियाले नागपुरमा भारतलाई ३४२ रनले हराएको थियो।
बावुमाको टेस्टमा अपराजित रेकर्ड कायम
दक्षिण अफ्रिकी कप्तान टेम्बा बावुमाको अपराजित रेकर्ड जारी छ। उनको कप्तानीमा टोली अहिलेसम्म एकपटक पनि टेस्ट हारेको छैन। उनले कप्तानी गरेको १२ खेलमध्ये १२ नै जितेका छन्। एक खेल ड्र भएको थियो ।
