काठमाडौं । रक्षा बम नेतृत्वको नेपाल जेन–जी फ्रन्टले प्रधानमन्त्री सुशीला कार्कीका प्रमुख स्वकीय सचिव आदर्शकुमार श्रेष्ठलाई तत्काल बर्खास्त गर्न माग गरेको छ ।
फ्रन्टले परिवारका सदस्य तथा नातेदारहरुलाई दिलाएको नियुक्ति खारेज गर्नसमेत माग गरेको छ ।
श्रेष्ठले परिवारका सदस्य र नातेदारहरुलाई प्रधानमन्त्री कार्कीको सचिवालयमा नियुक्ति दिलाएको समाचार सार्वजनिक भएपछि जेन–जी फ्रन्टले श्रेष्ठलाई तत्काल बर्खास्त गरी नियुक्तिसमेत खारेज गर्न माग गरेको हो ।
जेन–जी फ्रन्टले विज्ञप्ति जारी गर्दै राज्यको कार्यकारी प्रमुखको सचिवालय जस्तो संवेदनशील निकायमा नातावाद, कृपावाद र पारिवारिक सम्बन्धका आधारमा नियुक्ति हुनु पदको दुरुपयोग मात्र नभइ सुशासन, नैतिकता, जवाफदेहीता र पारदर्शीताविरुद्धको प्रत्यक्ष प्रहार हो भनेको छ ।
विज्ञप्तिमा भनिएको छ– ‘सुशासन र जवाफदेहीताको नाराका बलमा बनेको सरकारमा पुन नातावाद र कृपावादमा आधारित नियुक्त कसरी सम्भव भयो ? प्रधानमन्त्री कार्यालयका तर्फबाट तत्काल स्पष्टीकरणसहित सत्यतथ्य जानकारी दिनुपर्छ ।’
