काठमाडौं: मुलुकमा सहकारीहरुमा एकपछि अर्को संकट आइरहे पनि सपना बहुउद्देश्यीय सहकारी संस्था भने यसवर्ष नाफा कमाउन सफल भएको छ ।
सहकारीको आज राजधानीमा सम्पन्न २८औं वार्षिक साधारण सभामा प्रस्तुत प्रतिवेदनमा आर्थिक वर्ष २०८१/८२ मा संस्थाले २ लाख ३१ हजार ३४२ रुपैयाँ नाफा गर्न सफल भएको उल्लेख छ जसमा २ करोड ४८ लाख ५० हजार कूल आम्दानी र २ करोड ४६ लाख १९ हजार खर्च भएको छ ।
संस्थाले चालू आर्थिक वर्ष २०८२/८३ मा नाफा वृद्धि गरी १४ लाख ६६ हजार रुपैयाँ हुने प्रक्षेपण पनि गरेको छ ।
सभामा प्रस्तुत लेखापरीक्षण प्रतिवेदनमा संस्थाले रु. ४८ लाख ७४ हजारको गैह्र बैंकिङ सम्पत्ति (शेयर धितो) बिक्री गर्न लागेको उल्लेख छ । यसबाट संस्थाको आम्दानी बृद्धि हुनुका साथै संस्थाको लगानीमा थप गुणात्मक पक्ष सुदृढ हुने संस्थाका प्रमुख कार्यकारी अधिकृत रामचन्द्र अर्यालले जानकारी दिनुभयो ।
संस्थाका अध्यक्ष प्रज्वल थान्जुले वार्षिक प्रतिवेदन प्रस्तुत गर्दै गत वर्ष तरलताको पर्याप्ततामा बस्नु पर्दा संस्थाले घाटा व्यहोर्नु परे पनि यस वर्ष संस्था नाफामा जान सफल भएको जानकारी दिनुभयो ।
उहाँले संस्थाले खरिद गरेको पुतलीसडकस्थित आफ्नै भवनबाट सेवाकेन्द्र सञ्चालन गर्ने पनि बताउनुभयो । यस सहकारीको केन्द्रीय कार्यालय हाल कमलादीमा रहेको छ ।
यस सहकारीबाट साधारण बचत, बचत प्लस, विशेष बचत, दैनिक बचत, सपना स्वर्ण बचत, सपना विशेष बचत, क्रमिक बचत (३० महिने), अनिवार्य बचत (६० महिना), बाल भविष्य बचत, बाल भविष्य क्रमिक बचत जस्ता बचत कार्यक्रम संचालनमा छन् ।
संस्थाले हायरपर्चेज, व्यापार, उद्योग, कृषि, शैक्षिक, सेवा (शेयर), जग्गा खरिद, सामाजिक, सुलभ व्यक्तिगत, वैदेशिक रोजगार, व्यक्तिगत र घर निर्माण, जग्गा विकासमा लगानी गरिरहेको प्रमुख कार्यकारी अधिकृत रामचन्द्र अर्यालले बताउनुभयो ।
