काठमाडौँ । प्रतिनिधिसभा पुनःस्थापनाको मागलाई निरन्तरता दिइरहेको नेपाल कम्युनिस्ट पार्टी (एमाले)ले आगामी प्रतिनिधिसभा निर्वाचन लक्षित गर्दै निर्वाचन आयोगमा दल दर्ता गरेको छ।
पार्टीले संविधानसम्मत नियमित प्रक्रियाअन्तर्गत दल दर्ता गरिए पनि प्रतिनिधिसभा पुनःस्थापनाको माग अपरिवर्तित रहेको स्पष्ट गरेको छ।
एमाले प्रचार विभाग प्रमुख राजेन्द्र गौतमका अनुसार पार्टीले संसद् पुनःस्थापनालाई प्राथमिक मागको रूपमा अघि सारे पनि निर्वाचन प्रक्रियामा सहभागी हुनका लागि दल दर्ता आवश्यक भएकाले दर्ता गरिएको हो।
“संसद् पुनःस्थापनाको हाम्रो माग कायम राख्दै निर्वाचन आयोगमा दल दर्ता गरेका हौँ,” उनले बताए।
यसअघि मंगलबार बसेको विघटित प्रतिनिधिसभाको एमाले संसदीय दलको बैठकले प्रतिनिधिसभा पुनःस्थापनाका लागि सर्वोच्च अदालतमा रिट दायर गर्ने निर्णय गरेको थियो। पार्टीले कानुनी लडाइँसँगै राजनीतिक तथा संगठनात्मक तयारीलाई पनि तीव्र पारेको छ।
