जनकपुरधाम । मधेश प्रदेशसभाको आज बस्ने बैठक एमाले प्रदेशसभा सदस्यहरूले बहिष्कार गर्ने भएका छन्।
आजको कार्यसूचीमा सभामुख रामचन्द्र मण्डलमाथि पदअनुसार आचरण नगरेको भन्ने प्रस्तावमाथि छलफल रहेको छ।
एमालेले आफूहरूले कुनै पनि असंवैधानिक काम नगरेको स्पष्ट दाबी गर्दै बैठकमा नबस्ने निर्णय गरेको हो।
एमाले प्रमुख सचेतक हरिनारायण महताले आजको बैठकमा नआउने जनाएका छन्। यद्यपि, घरायसी कामका कारण उपस्थित हुन नसक्ने बताएका छन् ।
एमालेका अर्का सांसद राजकुमार लेखी भने पार्टीभित्रै बैठक बहिष्कारबारे स्पष्ट आधिकारिक जानकारी नआएको दाबी गर्छन्। लेखीले आफू पनि आजको बैठकमा नजाने संकेत गरे।
उनले सभामुखले आफूहरूलाई बैठकका लागि नबोलाएको र कुनै सूचना नआईपुगेको दाबी गरे। विपरीत रूपमा प्रदेशसभा सचिवालयका कर्मचारीहरूले भने सबै प्रदेशसभा सदस्यलाई एसएमएसमार्फत बैठकको सूचना पठाइएको पुष्टि गरेका छन्।
आजको बैठक प्रतिपक्ष एमालेको अनुपस्थितिमै बस्ने छ।
