काठमाडौं । प्रधानमन्त्री केपी शर्मा ओलीको अस्पताल बसाइँ लम्बिने भएको छ । उपचारमा संलग्न चिकित्सकका अनुसार प्रधानमन्त्री ओलीलाई हल्का ज्वारो आएका कारण अस्पताल बसाइँ लम्बिने भएको हो ।
प्रधानमन्त्रीलाई फागुन २८ गते डिस्चार्ज गर्ने तयारी गरेको थियो । तर प्रधानमन्त्री ओलीलाई ज्वरो आएपछि डिस्चार्ज नगरिएको एक चिकित्सकले बताए।
‘अपरेसन गरेपछि घाउ दुखेर ज्वरो आउँछ। उहाँलाई पनि सामान्य ज्वरो आएकाले डिस्चार्ज नगरिएको हो,’ ती चिकित्सकले भने,’उहाँको रगत र पिसाब परीक्षणका लागि पठाइएको छ। कतिपय रिपोर्टहरू आउन समय लाग्छ। त्यही भएर केही दिन बसाइँ लम्बिन लागेको हो।’
चिकित्सकहरूका अनुसार बालुवाटार गएपछि प्रधानमन्त्री भेटघाटमा बढी व्यस्त हुने भएकाले प्रधानमन्त्री पत्नी राधिका शाक्यले प्रधानमन्त्रीलाई केही दिन अस्पताल राख्न चाहेकी छन्।
कतिपय अवस्थामा सामान्य ज्वरो आउँदा सिटामोलले ठीक हुने भए पनि प्रधानमन्त्रीको संवेदनशिलतालाई ध्यानमा राखेर रगत र पिसाबको परीक्षण गराइएको चिकित्सकहरूको भनाइ छ।
