काठमाडौँ । नवगठित नेपाली कम्युनिस्ट पार्टी (नेकपा)का नेता झलनाथ खनालले युवा सहभागितासहित संगठन सुदृढिकरण र एकतामुखि अभियानलाई प्राथमिकता दिँदै पार्टीलाई सबै पुस्ताको साझा पार्टी बनाउनुपर्ने बताउनुभएको छ ।
आईतवार पेरिडाँडामा बसेको पूर्वपदाधिकारीहरुको छलफलपछि सञ्चारकर्मीसँग कुरा गर्दै उहाँले सो दाबी गर्नुभएको हो । उहाँले पार्टी संगठनलाई थप मजबुत बनाउन प्रदेश–प्रदेशमा सन्देश सभा आयोजना गरिने बताउनु भयो । उहाँले कम्युनिष्ट पार्टीहरुबीचको एकता कसैको विरोधमा नभई जनतालाई जागृत, संगठित र समाजवादको बाटोतर्फ उन्मुख गराउने मुख्य उद्देश्य रहेको पनि स्पष्ट पार्नुभयो । उहाँले थप केही राजनीतिक दलहरूसँग पनि एकताका सम्भावनाबारे छलफल भइरहेको बताउनु भयो ।
उहाँले भन्नुभयो, ‘अब पार्टीलाई हामी नेपाली विशेषताको समाजवादमा लैजाने हो । सम्पूर्ण पार्टीलाई हामीले त्यो ढंगले एकतावद्ध गर्ने हो । हाम्रो यो एकता अरु कसैका विरुद्ध होइन । आम जनतालाई जागृत र संगठित गर्ने तथा समाजवादको बाटोतर्फ लाने नेपाली विषेशताको समाजवाद स्थापना गर्ने हाम्रो एक मात्र अर्जुनदृष्टि हुनेछ । एकताका लागि विभिन्न राजनीतिक दलहरुसँग समेत कुराकानी भइरहेको छ । अब कम्युनिष्ट पार्टी भनेको युवाहरु, पाकाहरु, अझै किशोरहरु यी सबैको पार्टी भएको हुनाले त्यही हिसाबले पार्टीलाई एकतावद्ध गर्दै युवा सहभागिता बढाउने कामहरु गर्नुपर्छ । अब नेपाली कम्युनिष्ट पार्टीले पनि युवाहरुलाई प्रोत्साहन गर्ने गर्ने प्राथमिकता दिने कुराहरु यस पार्टीले गर्नैपर्छ र गर्छ पनि । त्यो सन्देश समेत लिएर जान्छौं ।’
उहाँले नेपाली विषेशतामा आधारित समाजवाद निर्माण गर्न पार्टी प्रतिवद्ध रहेको पनि बताउनु भयो ।
