काठमाडौं । राष्ट्रिय स्वतन्त्र पार्टी (रास्वपा)ले आगामी फागुन २१ गते हुने प्रतिनिधिसभा निर्वाचनका लागि समानुपातिक प्रणालीतर्फको उम्मेदवारको आवेदन आह्वान गरेको छ । चितवनको सौराहामा कात्तिक २१ र २२ गते सम्पन्न केन्द्रीय समितिको विस्तारित बैठकको निर्णयअनुसार रास्वपाले उम्मेदवार छनोटको रुपरेखामा आधारित रहेर उम्मेदवारी दिन आह्वान गरेको हो ।
रास्वपाले निर्वाचनमा ४० वर्ष मुनिका युवाहरूलाई २७ प्रतिशत र विदेशबाट फर्किएका नागरिकलाई १० प्रतिशत प्रतिनिधित्व सुनिश्चित गरेको छ । पार्टीले आइतबार सार्वजनिक गरेको विज्ञप्तिमा भनिएको छ, ‘जेनजीको स्पिरिडको प्रतिनिधित्वलाई समानुपातिक बन्दसूचीमा समेट्दै ४० वर्षमुनिका युवाका लागि उनीहरूको जनसङ्ख्याको अनुपातकै आधारमा २७ प्रतिशत प्रतिनिधित्व सुनिश्चित गरिएको छ । त्यस्तै प्रदेशबाट फर्किएका नेपाली उम्मेदवार बन्न १० प्रतिशत प्रतिनिधित्व सुनिश्चित गरिएको छ । ’
त्यसैगरी, उम्मेदवार हुन चाहने व्यक्ति सार्वजनिक पदको दुरुपयोग नगरेको, वैवाहिक अवस्था वैध रहेको, जात–लिंगको आधारमा अपमान वा कमजोर समूहको शोषण जस्ता आचरण नगरेको, आम्दानी पारदर्शी भएको लगायतका स्वघोषणा गर्नुपर्ने रास्वपा प्रवक्ता मनिष झाले जानकारी दिए ।
