काठमाडौँ । सर्वोच्च अदालत र जिल्ला अदालत काठमाडौँले गत भदौ २४ गते अदालत परिसरमा भएको आगजनी घटनाको अनुसन्धानका लागि जिल्ला प्रहरी परिसर काठमाडौंमा जाहेरी दिएका छन् ।
जाहेरीमा कसैको नाम किटान गरिएको छैन । जिल्ला प्रहरी परिसर काठमाडौँका प्रमुख एसएसपी रमेश थापाका अनुसार जाहेरी दर्ता भएसँगै घटनाबारे अनुसन्धान सुरु गरिएको छ ।
काठमाडौँ जिल्ला अदालतले भवन र अन्य सामग्री गरी करिब ६२ करोड रुपैयाँको क्षतिको विवरण सहित जाहेरी दर्ता गराएको जनाएको छ। भदौ २४ गतेको घटनामा सात वटा उच्च अदालतमा समेत आगजनी र तोडफोड भएका थिए ।
सर्वोच्च अदालतको पत्राचार अनुसार ती अदालतहरूले पनि आफ्ना क्षतिको विवरण संकलन गरी प्रहरीमा जाहेरी दिने तयारी गरिरहेका छन् ।
