काठमाडौं । ऊर्जामन्त्री कुलमान घिसिङले आफूले पदबाट राजीनामा दिने चर्चा निराधार भएको स्पष्ट गरेका छन् ।
सामाजिक सञ्जालमार्फत आफ्नो धारणा सार्वजनिक गर्दै मन्त्री घिसिङले राजीनामा दिन लागेको भन्ने समाचारमा कुनै सत्यता नभएको बताएका हुन् ।
उनले लेखेका छन्, “पदबाट राजीनामा दिन लागेको भन्ने समाचारमा सत्यता नरहेको प्रष्ट पार्न चाहन्छु । जेन–जी पुस्ताको ऐतिहासिक आन्दोलनपछि विषम परिस्थितिमा बनेको यो सरकार जनताको आशा र विश्वास पूरा गर्न प्रतिबद्ध छ ।”
मन्त्री घिसिङले थपे, “तीनवटा मन्त्रालयको जिम्मेवारी सम्हाल्दै म निरन्तर रूपमा आन्दोलनले दिएको जनादेश र विश्वास पूरा गर्न क्रियाशील छु ।”
हाल घिसिङ ऊर्जासँगै दुई अन्य मन्त्रालयको पनि कार्यभार सम्हालिरहेका छन् ।
