काठमाडौं । नेकपा माओवादी केन्द्र र नेकपा (एकीकृत समाजवादी) बीच पार्टी एकताको सहमतिपछि संयोजक पुष्पकमल दाहाल ‘प्रचण्ड’ र अध्यक्ष माधवकुमार नेपालबीच भेटवार्ता भएको छ ।
प्रचण्ड वरिष्ठ उपाध्यक्ष नारायणकाजी श्रेष्ठसहित मंगलबार पार्टी कार्यालय आलोकनगर पुगेका थिए । बैठकमा एकता सभाको तयारीदेखि आगामी राजनीतिक रणनीतिसम्मका विषयमा विस्तृत छलफल भएको जनाइएको छ ।
माओवादी केन्द्र र एकीकृत समाजवादीसहित आठ पार्टीबीच एकताको सहमति भइसकेको छ। नयाँ एकीकृत पार्टीले ‘पाँचकुने तारा’ चुनाव चिह्न कायम गर्ने निर्णय गरेको छ । तर पार्टीको नामबारे भने अन्तिम निष्कर्ष निकालिएको छैन ।
पार्टी एकताको निर्णयसँगै एकीकृत समाजवादीभित्र असन्तुष्टि देखिएको छ भने माओवादी केन्द्रभित्र पनि विभाजनको सम्भावना बढेको बताइन्छ । सहमतिअनुसार एकीकृत पार्टीमा प्रचण्ड संयोजक र माधव नेपाल सह–संयोजक रहने तय गरिएको छ ।
