काठमाडौं । काठमाडौं महानगरपालिकाले फोहरमैला घरमै सुरक्षित रूपमा राख्न आग्रह गरेको छ ।
काठमाडौं उपत्यकाको मुख्य फोहर बिसर्जनस्थल बन्चरेडाँडा ल्याण्डफिल साइटमा स्थानीयवासीले अवरोध गरेपछि फोहर व्यवस्थापन ठप्प भएको हो ।
महानगरको वातावरण व्यवस्थापन विभागले आज सूचना जारी गर्दै अवरोधका कारण फोहर बिसर्जन गर्न नसकिएकोले अर्को सूचना नआएसम्म घर वा कम्पाउण्डभित्र फोहर सुरक्षित रूपमा राख्न अनुरोध गरेको छ ।
महानगरले सडक तथा सार्वजनिक स्थानमा जथाभावी फोहर नफाल्न पनि आग्रह गरेको छ ।
यसअघि बन्चरेडाँडाका स्थानीयवासीले विभिन्न माग राख्दै फोहर बोक्ने गाडी बीच बाटोमै रोकेका थिए । त्यसपछि उपत्यकामा पुनः फोहर संकट सिर्जना भएको छ ।
स्थानीयवासीले सरोकारवाला मन्त्री र काठमाडौंका मेयर बालेन शाह स्वयं आएर वार्ता गर्नुपर्ने माग गरेका छन् ।
