काठमाडौँ । गायिका नितु पौडेलको आत्मदाह प्रयासपछि उपचारका क्रममा मृत्यु भएको छ ।
प्रहरीले जानकारी दिएअनुसार कीर्तिपुर बर्न अस्पतालमा आज बिहान ८ः२० बजे उनको निधन भएको हो ।
गत शनिबार दिउँसो पौडेलले संगीतकार तथा गायक बाबुल गिरीको कार्यालयमा गएर आफ्नै शरीरमा पेट्रोल खन्याई आगो लगाएकी थिइन् । सो घटनापछि गम्भीर रुपमा घाइते भएकी उनलाई तत्काल अस्पताल भर्ना गरिएको थियो ।
घटनाको कारणबारे अनुसन्धान भइरहेको प्रहरीले जनाएको छ । पौडेलले १२ दिनअघि आफ्नो फेसबुक पेजमा एक निराशाजनक स्टाटस लेखेकी थिइन् । उनले लेखेकी थिइन्, “हासिरहने यो मुहारभित्रको उदासीपन हरकोहीले कहाँ बुझ्न सक्छ र ?”
पौडेलका निधनप्रति संगीत क्षेत्रका सहकर्मी तथा शुभेच्छुकहरूले सामाजिक सञ्जालमार्फत दुःख व्यक्त गरेका छन् ।
