काठमाडौँ । आगामी निर्वाचनको तयारीका विषयमा प्रधानमन्त्री निवास बालुवाटारमा आज राजनीतिक दलहरूसँग संवाद हुँदैछ ।
प्रधानमन्त्री सुशीला कार्कीले आह्वान गर्नुभएको उक्त संवादमा राष्ट्रिय मान्यता प्राप्त दलका साथै विघटित प्रतिनिधि सभामा प्रतिनिधित्व गर्ने दलका प्रतिनिधिहरू सहभागी हुनेछन् ।
प्रधानमन्त्री सचिवालयका अनुसार संवाद कार्यक्रम केहीबेरमै सुरु हुँदैछ ।
संवादमा नेपाली कांग्रेसबाट गगन थापा र प्रकाशशरण महत, नेकपा (एमाले)बाट शंकर पोखरेल र प्रदीपकुमार ज्ञवाली, माओवादी केन्द्रबाट वर्षमान पुन र पम्फा भुसाल, राष्ट्रिय स्वतन्त्र पार्टीबाट स्वर्णिम वाग्ले र सोविता गौतम, राष्ट्रिय प्रजातन्त्र पार्टीबाट राजेन्द्र गुरुङ र मोहन श्रेष्ठ सहभागी हुनेछन् ।
त्यसैगरी जनता समाजवादी पार्टीबाट उपेन्द्र यादव र प्रकाश अधिकारी, लोकतान्त्रिक समाजवादी पार्टीबाट सर्वेन्द्रनाथ शुक्ल, नागरिक उन्मुक्ति पार्टीबाट रेशम चौधरी, नेपाल मजदुर किसान पार्टीबाट प्रेम सुवाल, र जनमत पार्टीबाट चन्दन सिंह सहभागी हुनेछन् ।
संवादमा केदारभक्त माथेमा र विद्याधर मल्लिक पर्यवेक्षकका रूपमा उपस्थित रहेको प्रधानमन्त्री सचिवालयले जनाएको छ ।
प्रधानमन्त्री कार्कीले आगामी फागुन २१ गते तय गरिएको निर्वाचनका तयारी, निष्पक्षता र सबै दलको सहभागिता सुनिश्चित गर्ने उद्देश्यले यो संवाद आयोजना गर्नुभएको बताइएको छ ।
