काठमाडौँ । नेकपा (माओवादी केन्द्र)का संयोजक पुष्पकमल दाहाल ‘प्रचण्ड’ की छोरी तथा उनका सचिवालय संयोजक गंगा दाहालले आफ्नो पदबाट राजीनामा दिएको घोषणा गरेकी छन् ।
फेसबुकमा स्टाटस लेख्दै उनले सचिवालय संयोजकको जिम्मेवारीबाट राजीनामा दिएको सार्वजनिक गरेकी हुन् । उनले आफूलाई देखाएर प्रचण्ड र समग्र पार्टीमाथि योजनाबद्ध प्रहार भइरहेको आरोप लगाएकी छन् ।
गंगाले लेखेकी छन्, “म, मेरा दिदीहरू र भाइले महान जनयुद्धको समयमा राज्य सत्ताले निरन्तर दुःख दिएको कारण पढाइबाट वञ्चित भएरै पार्टीमा निरन्तर लागीरह्यौं । तर अहिले ममाथि भइरहेको कुप्रचार र भ्रामक सूचनाले निकै पीडा दिएको छ।”
उनले आफ्नो लवाई–खुवाई र व्यक्तिगत जीवनलाई लिएर निरन्तर भ्रम फैलाइएको र सञ्चारमाध्यममार्फत चरम रूपमा बदनाम गर्न खोजिएको गुनासो गरेकी छन् ।
“कहिले कति लाखको ब्याग भनिदिन्छन्, कहिले कति लाखको घडी भनेर प्रचार गर्छन् । लाख पर्ने ब्याग र घडी मैले जिन्दगीमा कहिले किनेकी पनि छैन । साथीहरूले जन्मदिनको अवसरमा दिएको उपहार थियो, सक्कली थियो कि नक्कली त्यो पनि जलेर खरानी भइसकेको छ, तर अझै त्यही कुरा ल्याएर प्रहार भइराखेको छ,” गंगाले लेखेकी छन् ।
राजीनामाको अन्त्यमा उनले पार्टी र अध्यक्षप्रति सम्मान प्रकट गर्दै आफूले भविष्यमा पनि सकारात्मक योगदान दिने विश्वास व्यक्त गरेकी छन् ।
