काठमाडौं । सहिद स्मारक ‘ए’ डिभिजन लिग फुटबल अन्तर्गत हिमालयन शेर्पाले जित निकालेको छ ।
सोमबार दिउँसो भएको खेलमा शेर्पाले नवप्रवेशी क्लब सातदोबाटो युथ क्लबलाई १-० गोल अन्तरले हराएको हो ।
शेर्पालाई जित दिलाउन कप्तान विश्वास श्रेष्ठले निर्णायक गोल गरे । खेलको ४५ औं मिनेटमा विश्वासले पेनाल्टीमा गोल गरेका हुन् ।
सातदोबाटोका पिटर सेगुनले पेनाल्टी क्षेत्रमा त्रिदेब गुरुङलाई फउल गरेपछि शेर्पाले पेनाल्टीको अवसर पाएको थियो । जसको मौका विश्वासले खेर जान दिएनन् ।
यस्तै खेलको इन्जुरी समयमा सातदोबाटोले पेनाल्टीको अवसर पाएको थियो । तर, सातदोबाटोका मार्टिन सिलोले पेनाल्टीमा चुकेपछि सातदोबाटोले बराबरी गर्ने अवसर गुमायो ।
जितसँगै शेर्पाले ७ खेलमा ११ अंक जोडेको छ भने सातदोबाटोको ७ खेलमा ८ अंक छ ।
शेर्पाका गोलकर्ता विश्वास प्लेयर अफ दि म्याच घोषित भए ।
