एजेन्सी । बंगलादेशको राजधानी ढाकामा मंगलवार एक कपडा कारखाना र एक रासायनिक गोदाममा आगलागी हुँदा १६ जनाको मृत्यु भएको छ । स्थानीय मिडिया रिपोर्टकाअनुसार बंगलादेश युनिभर्सिटी अफ बिजनेस एण्ड टेक्नोलोजीको अगाडि दुई भवनहरू छेउछाउमा अवस्थित छन् ।
१२ जनाको शव ढाका मेडिकल कलेज अस्पताल र ढाकाको राष्ट्रिय जलन तथा प्लास्टिक सर्जरी संस्थानमा लगिएको बताइएको छ । अधिकारीकाअनुसार सात तले कपडा कारखानामा आगलागी तेस्रो तल्लाबाट शुरु भएको थियो ।
आगो निभाउन कम्तिमा १२ वटा दमकल इकाइहरू घटनास्थलमा पुगेका थिए । रासायनिक गोदाममा ब्लीचिङ पाउडर, प्लास्टिक र हाइड्रोजन पेरोक्साइड लगायतका खतरनाक सामग्रीहरू भण्डारण गरिएको थियो । आगोको कारण पत्ता लागेको छैन ।
