काठमाडौं । नेपालका वायुसेवा कम्पनीले कोरोनाभाइरस (कोभिड–१९)को प्रभावका कारण कर्मचारीको तलब सुविधामा ५० प्रतिशतसम्म कटौती गर्ने निर्णय गरेका छन् । वायुसेवा सञ्चालक संघ नेपालको बिहीबारको बैठकले मासिक रु २० हजारसम्म पारिश्रमिक पाउने कर्मचारीको तलब कटौती नगर्ने निर्णय गरेको हो । संघले कर्मचारीका लागि हुने खर्च घटाउन समिट एयरका सञ्चालक समिति सदस्य सुमन पाण्डेको अध्यक्षतामा १० सदस्यीय एक उच्चस्तरीय समिति गठन गरेको छ । समितिले वायुसेवा कम्पनीमा कार्यरत कर्मचारीको तलव तथा सुविधा कटौती गर्न सम्बन्धित वायुसेवा कम्पनीसँगको समन्वय गरेर एक साताभित्र सूचना सार्वजनिक गर्ने जिम्मेवारी पाएको छ ।
संघले मासिक रु २० हजार भन्दा माथि रु ३० हजारसम्म मासिक पारिश्रमिक बुझ्ने कर्मचारीको २० प्रतिशत, रु १ लाखसम्म पारिश्रमिक पाउने कर्मचारीको ४० प्रतिशत र रु १ लाख भन्दा बढी पारिश्रमिक पाउने कर्मचारीको तलब तथा सुविधा ५० प्रतिशत कटौति गर्ने निर्णय गरेको स्रोतले जानकारी दिएको हिमाल खबरमा समाचार छ ।
साथै कर्मचारीलाई बेतलबी विदा लिन प्रोत्साहन गर्ने, अनिवार्य विदामा बस्न लगाउने तथा प्रतिकुल अवस्थामा कर्मचारीको करार सम्झौता रद्द गराउनेसम्मको निर्णय समितिले गराउन सक्ने छ । वायुसेवाको संख्याअनुसार माग नहुने अवस्थामा सबै वायुसेवा कम्पनीको जहाज अनुपात मिलाएर ग्राउन्डेड गराउनेसम्मको निर्णय संघले गरेको छ ।
