टीकापुर । लकडाउनका समयमा कैलालीको टीकापुर क्षेत्रमा महिला हिंसाका घटनामा कमी आएको छ । नेपालमा लकडाउनपछि शुक्रबारसम्म इलाका प्रहरी कार्यालय टीकापुरमा हिंसाका दुई मात्र उजूरी दर्ता भएका छन् ।
‘‘लकडाउनको २५ दिनमा दुई महिलाले मात्रै हिंसामा पर्यौँ भनी उजुरी गरेका छन् । दुई वटा घटना पनि श्रीमान्ले मदिरा सेवन गरी झगडा र कुटपिट गरेका हुन् ’’, इलाका प्रहरी कार्यालय टीकापुरका प्रमुख डिएसपी मनोहरप्रसाद भट्टले भन्नुभयो, ‘‘हामीले उनीहरुकै घरमा गएर सम्झाएर आयौँ । आइन्दा हिंसा नगर्ने शर्तमा प्रहरीकहाँ ल्याएनौंँ, त्यसपछि पनि जानकारी लिएका छौँ, उनीहरुमाथि हिंसा भएको छैन ।’’
डिएसपी भट्टका अनुसार विगत महिनामा २० भन्दा बढी महिला हिंसाका उजूरी दर्ता हुन्थे । बन्दाबन्दीपछि हिंसाका घटनामा कमी आएका छन् । प्रहरीका अनुसार सो क्षेत्रमा मदिराकै कारण महिला हिंसामा पर्छन् । ‘‘लकडाउनका कारण पुरुषहरु घरमै बस्नुपर्दा मदिरा खान पाएनन्, जसले हिंसाका घटनामा पनि कमी आयो’’, भट्ट भन्नुहुन्छ, ‘‘हामीले लकडाउनको समयमा घरेलु मदिरा बिक्री गरिरहेका केही स्थानबाट चार सय लिटर बरामद समेत गरेका छौँ ।’’
टीकापुर बहुमुखी क्याम्पसमा समाजशास्त्र विषयका उपप्राध्यापक रामप्रसाद तिवारी पनि मदिराले महिलामाथि हिंसा बढाउने गरेको बताउनुहुन्छ । ‘‘यस्तो विपत्तिको समयमा महिलामाथि हिंसा हुनु दुःखद् कुरा हो । सबै घरभित्रै बसिरहेका कारण हिंसाका घटना प्रहरीसमक्ष नपुगेका पनि हुन सक्छन्’’, उपप्राध्यापक तिवारी भन्नुहुन्छ, ‘‘अप्ठेरो समयमा महिलामाथि हिंसा गर्ने त अपराधी हुन्, महिलामाथि हुने दुव्र्यवहार न्यूनीकरण गर्न समाजका सबै नागरिक जिम्मेवार बन्नुपर्छ ।’’
लकडाउनपछि सवारी दुर्घटनाका घटनामा समेत कमी आएको प्रहरीले जनाएको छ । मानिस हिँड्न र सवारी साधन नचलेपछि सवारी दुर्घटना नभएको इलाका प्रहरी कार्यालय टीकापुरले जनाएको छ ।
