काठमाडौं । विश्वव्यापी महामारीको रुपमा फैलिँदै गएको कोरोना भाइरसको संक्रमण नियन्त्रण गर्न लकडाउन गरिएको समयमा धेरै मानिसको विचल्ली भएको छ । संकटको यो अवस्थामा सरकारले मात्र सहयोग गरेर विचल्लीमा परेकाहरुले राहत पाउन सक्ने अवस्था देखिन छाडेको छ । अहिले धेरैलाई मानवीय सहायता आवश्यक छ । मानवहरुमा एउटा आइपरेको संकटको यो घडीमा लायन्स क्लब इन्टरनेसनल डिस्ट्रिक्ट ३२५ ए वानले विपत्तिमा परेकाहरुलाई सहयोग गर्ने क्रम बढाएको छ ।
लायन्स क्लब इन्टरनेसनल डिस्ट्रिक्ट ३२५ ए वानले फुड बैंक नै सञ्चालनमा ल्याएर लकडाउनको अवधिमा दैनिक श्रमका आधारमा रोजीरोटी गरी खाने समुदाय भोकभोकै वस्ने अवस्था सिर्जना भएपछि पीडितलाई राहत उपलब्ध गराउन थालेको हो ।
लायन्स फुड बैंकले हाल भइरहेको संकटको विषम परिस्थितिमा देशका विभिन्न स्थानमा रहेका आश्रयस्थलहरु, दैनिक ज्यालादारी गर्ने श्रमिकलगायत खाद्यान्न अभाव सिर्जना भएको स्थानहरुमा खाद्यान्न पु¥याउने गरेको छ । फुड बैंकमा विभिन्न क्लबले सहयोग गर्ने गरेका छन् । अहिलेसम्म ३५ लाख रुपैयाँ जम्मा पारेर देशका विभिन्न ४० ठाउँमा राहत वितरण गरिएको लायन्स क्लब इन्टरनेसनल डिस्ट्रिक्ट ३२५ ए वानका निवर्तमान गभर्नर अनन्तप्रसाद भेटवालले जानकारी दिनुभयो । कतिपय संघसंस्थालाई परिस्थिति र आवश्यकता हेरेर ३ महिनासम्म पुग्ने गरी खाद्यान्न वितरण गरिएको उहाँको भनाइ छ ।
लायन्स क्लब इन्टरनेसनल डिस्ट्रिक्ट ३२५ ए वानले फुड बैंकको मूल मर्मअनुसार देश र समाजमा कोही पनि एक छाक खाना नपाई भोको रहन नपरोस् भन्ने उद्देश्यलाई सार्थक बनाउन खाद्यान्न राहतका रुपमा वितरण गर्न थालेको हो ।
लायन्स क्लब इन्टरनेसनल डिस्ट्रिक्ट ३२५ ए वानले अब सडक मजदुर, विचल्लीमा परेकाहरुलाई ठाउँठाउँमा पुगेर १० किलो चामल, एक लिटर तेल, १ केजी नून, २ किलो दाल राहतस्वरुप वितरण गर्ने तयारी गरेको छ ।
लायन्स क्लब इन्टरनेसनल डिस्ट्रिक्ट ३२५ ए वान सामाजिक कार्यमा सक्रिय रहँदै आएको छ । कोरोना भाइरसको जोखिम कम गर्न संस्थाले दुर्गम ठाउँका गाउँपालिकाहरु र स्वास्थ्य संस्थाहरुलाई औषधि र औषधिजन्य सामग्रीसमेत उपलब्ध गराउँदै आएको छ ।