काठमाडौँ । राष्ट्रिय स्वतन्त्र पार्टी (रास्वपा)का केन्द्रीय सदस्य हरि ढकालले सुमना श्रेष्ठलाई लक्षित गर्दै दिएको विवादास्पद अभिव्यक्ति फिर्ता लिएका छन् ।
हिजो बसेको केन्द्रीय समितिको भर्चुअल बैठकमा ढकालले आफूबाट भावावेशमा गलत अभिव्यक्ति भएको स्वीकार्दै आत्मालोचना र क्षमायाचना गरेका हुन् ।
केही दिनअघि रास्वपाको बैठकमा सुमनाले सभापति रवि लामिछानेको रिहाइबारे प्रश्न उठाउँदा ढकालले ‘बाघको छालामा स्यालको रजाईं’ भन्ने उखान प्रयोग गर्दै कडा टिप्पणी गरेका थिए । सुमनाले तीन दिनअघि पार्टी परित्याग गरेपछि ढकालको उक्त अभिव्यक्ति पार्टीभित्र विवादको विषय बनेको थियो ।
बैठकले असोज २ गतेदेखि पार्टी गतिविधि नियमित सुचारु गर्ने र आन्दोलनका क्रममा क्षति भएका सार्वजनिक संरचनाको सफाइ तथा पुनर्निर्माणमा सघाउने निर्णय पनि गरेको छ ।
