काठमाडौँ । धरान उपमहानगरपालिकाका मेयर हर्क साम्पाङ जेनजी आन्दोलनपछिको परिस्थिति सम्झिँदै धरानमा आयोजित पत्रकार भेटघाटमा भक्कानिएका छन् ।
प्रधानमन्त्री बन्ने उद्देश्यसहित काठमाडौं गएर रित्तो हात फर्किएका उनले विदेशी शक्तिले देश ‘टेकओभर’ गर्ने सम्भावना बढेको बताए ।
भक्कानिँदै हर्कले भने, ‘विदेशीले यतिखेर टेकओभर गर्नसक्ने सम्भावना छ । सबै नेताहरू भागाभाग छन् । कोही रक्ताम्य छन् । कोही बागमतीमा कुटाइ खाँदै गरेको देखिन्छ ।’
साम्पाङले आफूलाई खानेपानी र श्रम मन्त्रालयको प्रस्ताव आए पनि नस्वीकारेको उल्लेख गरे । नेताहरू लुकेर बसेको समयमा देश जोगाउन आगोमा हाम्फाल्ने निर्णय गरेर काठमाडौं गएको उनको भनाइ छ । उनले अगाडि भने, ‘मलाई हिम्मत हारेको मान्छे भन्नुहुन्छ तपाईँहरू‘ म जतिको हिम्मतिलो मान्छे यो देशमा कोही पनि छैन ।’
प्रधानमन्त्री नियुक्तिबारे धेरै छलफल भए पनि सहमति नजुटेको र ‘मिनिस्टर हुनलाई सहमति र ढोग चाहिन्छ’ भन्ने सन्देश पाएको बताए। धरानको मेयर पद आन्दोलन र परिश्रमबाट पाएको भन्दै उनले आफूलाई हिम्मत हारेको नठान्न आग्रह गरे ।
साथै, उनले सरकार गठनमा “एकजना गेमर” संलग्न रहेको दाबी गर्दै वर्तमान सरकारको वैधतामाथि प्रश्न उठाए । जेनजी आन्दोलनमा सहभागीहरूलाई अपराधी ठहर्याइँदा सरकार र गृहमन्त्रालयले जिम्मेवारी लिनुपर्ने पनि उनको भनाइ छ ।
