कास्की। जिल्ला प्रशासन कार्यालय कास्कीले जेनजीको प्रदर्शनका क्रममा सार्वजनिक निकाय तथा निजी सम्पत्ति लुटिएकाले ती सामान फिर्ता गर्न सर्वसाधारणलाई अनुरोध गरेको छ ।
प्रशासनले आज एक सूचना जारी गरी लुटिएका सामग्रीसहित लुट्ने व्यक्तिका दृश्यहरू प्रहरीको सोधपुछ, सिसी क्यामेरा फुटेज र सामाजिक सञ्जालमार्फत पहिचान भइसकेकाले ती सामग्रीहरु तत् निकाय वा नजिकको प्रहरी इकाईमा बुझाइदिनुहुन अनुरोध गरेको हो ।
लुटपाटमा संलग्न व्यक्ति र सामग्रीहरु लुकाइएका स्थानसमेत पहिचान गर्ने काम भइरहेकाले लुटिएका सामग्री फिर्ता नगर्नेलाई कानुनी दायरामा ल्याइने प्रमुख जिल्ला अधिकारी रुद्रादेवी शर्माद्वारा जारी सूचनामा उल्लेख छ ।
यही भदौ २३ र २४ गतेको प्रदर्शनपछि विभिन्न सरकारी, अर्धसरकारी, निजी सम्पत्ति, व्यापारिक प्रतिष्ठान, होटल तथा राजनीतिक दलका कार्यालयहरुमा तोडफोड, आगजनी र लुटपाटका गतिविधि भएका प्रशासनले जनाएको छ ।
प्रशासनका अनुसार आन्दोलनका क्रममा सरकारी तथा अर्थसरकारी निकाय, निजी सम्पत्ति, व्यापारिक प्रतिष्ठान, राजनीतिक दलका कार्यालय तथा प्रहरी चौकीहरुबाट हातहतियार, सञ्चार उपकरण, फर्निचर, कम्प्युटर, ल्यापटप, मोबाइल, भाँडाकुँडालगायत सामग्री लुटपाट भएका छन् ।
जेनजी प्रदर्शनको क्रममा पोखराका सङ्घ, प्रदेश तथा स्थानीय सरकारका कार्यालयहरु, होटल तथा प्रहरी चौकीहरुमा आगजनी तथा तोडफोड र लुटपाट गरिएको थियो । यहाँका पाँच दर्जनभन्दा बढी कार्यालयमा आगजनी गरिएको छ । रासस
