काठमाडौं
कोराेनाभाइरसले पर्यटन क्षेत्रमा गंभीर असर गरेको भन्दै पर्यटनको पुनरुत्थानका लागि नेपाल चेम्बर अफ कमर्शले सरकारलाई सुझाव दिएको छ । सोमवार चेम्बर अफ कर्मशका अध्यक्ष राजेशकाजी श्रेष्ठको टोलीले संस्कृति पर्यटन तथा नागरिक उड्डयन मन्त्री योगेश भट्टराईलाई भेटी उक्त सुझाव दिएकाे हो ।
आन्तरिक पर्यटन प्रबर्द्धन गर्नका लागि निजामती तथा संगठित संस्थाका कर्मचारीहरु र नागरिकहरुलाई प्रोत्साहन प्याकेज सहित आन्तरिक भ्रमणका लागि प्रेरित गर्नुपर्ने, कोरोनाबाट होटल तथा एयरलाइन्सहरुलाई वित्तीय प्याकेज मार्फत उद्धार गरिनु पर्ने तथा ऋण, ऋणको ग्यारेन्टी कर्पोरेट बन्डमा सरकारको टेवा कर छुट, एयरपोर्ट चार्ज लगायतमा वित्तीय सुविधा दिनुपर्ने, पर्यटकको प्रबर्द्धनका लागि थिंक ट्यांकको व्यवस्था गर्ने लगायतका सुझाव दिएकाे छ ।
त्यस्तै मेडिकल टुरिजम, होम स्टे, एग्रो टुरिज्म , कल्चरल टुरिज्म लगायतका विधागत पर्यटन प्रबर्द्धनका लागि ठोस कार्यक्रम ल्याउन माग गरेका छन् । पर्यटकको चाप घटेको समयमा पर्यटन पूर्वाधारमा जोड दिनु पर्ने, नेपाल आयल निगमले माग्दै आएको नगद धरौटीको सट्टा बैङ्क ग्यारेन्टीको व्यवस्था गरी नगद धरौटी फिर्ता गर्नु पर्ने माग राखेकाे छ ।
चेम्बरले चीनमा कोरोनाको प्रकोप कम हुँदै गएकोले आउँदो सेप्टेम्बर, अक्टोबरमा पर्यटकीय सिजन भएकाले चीनका विभिन्न शहरबाट पर्यटक भित्र्याउन सरकारी स्तरबाट पहल गर्नुपर्ने, एयरलाइन्सहरुले चीनका विभिन्न शहरबाट पर्यटक ल्याउन पहल गर्नुपर्ने, हवाईजहाज, बस, कार सहित बास बस्ने स्थान होटल, रिसोर्ट, होमस्टे, रेस्टुरेन्ट तथा विमानस्थलमा डिसइन्फेक्ट गरिनु पर्ने सुझाव दिएकाे छ ।
साे अवसरमा मन्त्री भट्टराईले चेम्बरले दिएका सुझाव बुझदै सरकारले पर्यटन क्षेत्रको विकासको लागि काम गरिरहेको बताए । कोराेनाका कारण सबैभन्दा बढी प्रभाव पर्यटन क्षेत्रमा परेको भन्दै मन्त्री भट्टराईले आउने बजेट र नीति तथा कार्यक्रममा पर्यटन क्षेत्रकाे सुधारको प्याकेज घोषणा हुने बताए । उनले एयरलाइन्स होटल, रेस्टुरेन्टलाइ एकीकृत नीति मार्फत सम्बाेधन गरिने बताए ।
