मानव अंग मिर्गौला बेचविखनमा संलग्न ७ जनाको गरोहलाई नेपाल प्रहरीले पक्राउ गरेको छ ।
नेपाल प्रहरी मानव अनुसन्धान बेचविखन ब्युरोले आईतवार काठमाडौंमा पत्रकार सम्मेलन गरी सो जानकारी गराएको हो ।
भारतको नयाँ दिल्लीमा बसेर सो गैरकानूनी कार्यमा नायिकेको भुमिका निर्वाह गरिरहेका सिन्धुपाल्चोकका श्यामकृष्ण भण्डारीलाई महेन्द्रनगरबाट र उनको सहयोगीको रुपमा रहेका सुजन भारतीलाई वीरगञ्जबाट पक्राउ गरी संगठित अपराध अन्तर्गत कारबाही अघि बढाइएको ब्युरोका प्रमुख प्रहरी वरिष्ठ उपरीक्षक कृष्णप्रसाद पंगेनीले जानकारी दिनुभयो । सो गिरोहले पैसाको प्रलोभनमा पारेर काठमाडौं, नुवाकोट, काभ्रपलाञ्चोक, धादिङलगायतका सर्वसाधारणलाई भारतको नयाँ दिल्ली गरेर गैरकानूनी रुपमा मिर्गौला झिकी विक्री गर्ने गरेको पाइएको पनि प्रहरीले जनाएको छ ।
प्रहरी वरिष्ठ उपरीक्षक पंगेनीले भन्नुभयो, ‘गत साउनको २० गते ३ जना प्रतिवादीहरुलाई पक्राउ गरेर यो मुद्दा शुरुवात गरेका थियौ । र त्यही सिलसिलामा ५ जना मिर्गौला पीडितहरुले हामी कहाँ जाहेरी दिईसक्नुभएको छ । र यो समूह कहाँबाट परिचालित छ भनेर बुझ्दाखेरी भारतको दिल्लीमा नेपालीको अंग झिक्ने र त्यहीबाट अंगको कारोबार गर्ने भन्ने हामीले अनुसन्धानको क्रममा सूचना पायौं । त्यसपछि हामी अपरेशन शिल्ड भनेर एउटा गैर कानूनी अंग प्रत्यारोपण अथवा गैर कानूनी अंग झिक्नेहरुको जीवन रक्षा भनेर त्यसको अपरेशन अघि बढायौं । यसमा हालसम्म हामीले ४ वटा मुद्दा दर्ता गरिसकेका छौं । र त्यसमा संगठित रुपमा कानून विपरित मानव अंग झिकी मानव बेचबिखन, ओसार पसार गरेको कसुरमा हामीले म्याद थप गरेर अनुसन्धान अगाडि बढिरहेको अवस्था छ । र हामीले संगठित अपराध ऐनलाई आकर्षित गराएर त्यसैमा म्याद थप गराएको अवस्था छ । यसमा हामीले काठमाडौं, नुवाकोट, काभ्रेपलाञ्चोक जिल्लाहरुबाट विभिन्न व्यक्तिहरुलाई इण्डिया लगेर त्यहाँ मानव अंग झिक्ने कार्यमा ३ जना पहिले नै पक्राउ परिसकेका थिए भने अहिले पछिल्लो समय २ जना श्यामकृष्ण भण्डारी र सुजन भारती भन्ने इण्डियाबाट काम गरिरहेको र उनीहरुले यो काममा सबैलाई परिचालन गरिरहेको भन्ने पाइयो । भण्डारी सुनकोशी गाउँपालिका वडा नम्बर ७ सिन्धुपाल्चोक घर भएर लामो समयदेखि इण्डियाको दिल्लीमा बसेर काम गर्ने गरेका वर्ष ३८ का हुन् । र अर्को इन्द्रावती गाउँ पालिका २ सिन्धुपाल्चोक घर भएर भारत दिल्लीमा भण्डारीको सहयोगीको रुपमा काम गर्ने गरेका वर्ष २९ का सुजन भारती भन्ने दुई जना प्रतिवादीमध्ये हामीले श्यामकृष्ण भण्डारीलाई महेन्द्रनगर एरियाबाट र सुजन भारतीलाई बीरगंज एरियाबाट पक्राउ गर्न सफल भएका छौं । हिजो र अस्तीका दिनमा । उनीहरुलाई पनि हामीले यही मुद्दामा संगठित अपराधमा नै म्याद थप गरेको अवस्था छ । यस क्रममा नेपालको विभिन्न जिल्लाहरु जस्तो काभ्रे, सिन्धुपाल्चोक, सिन्धुली, नुवाकोट, धादिङलगायतका जिल्लाहरुमा रहेका सोझा मानिसहरुलाई गरिवीको फाईदा उठाएर पैसाको प्रलोभन देखाएर मृर्गौला विक्री गर्न प्रोत्साहित गरेको पाईन्छ । अनुसन्धानको क्रममा सो गिरोहका ७ जनालाई पक्राउ गरी कारबाही प्रक्रिया अघि बढाइएको छ ।’
सो गिरोहलाई संगठित अपरोध ऐन अन्तर्गत कारबाही प्रारम्भ गरिएको पनि प्रहरीले जनाएको छ । सो ऐन अन्तर्गत मानव बेचविखन र गैरकानूनी रुपमा अंग बेचविखनमा संलग्नलाई १० वर्ष कैद र २ लाख रुपैयाँसम्म जरिवाना गर्ने व्यवस्था रहेको पनि प्रहरी वरिष्ठ उपरीक्षक पंगेनीले बताउनु भयो ।
