धरान। धरान उपमहानगरपालिकाका नगरप्रमुख हर्कराज राई (साम्पाङ)ले बुधबार दिउँसो २ बजे कार्यपालिका बैठक बोलाएका छन्। बैठकमा कुल २६ वटा एजेन्डामा छलफल हुने बताइएको छ।
नगरपालिकाले मंगलबार जारी गरेको सूचनाअनुसार, बैठकमा खोला च्यानेलिङ गर्दा व्यहोरेको ढुवानी भाडा भुक्तानी, नीति तथा कार्यक्रम, बजेट सिफारिस, पालिका गानको अनुमोदन, बसपार्क व्यवस्थापन र कर्मचारी तहबृद्धि जस्ता विषयहरू एजेन्डामा समावेश छन्।
यस्तै, नगरसभाको १७औँ अधिवेशन आह्वान, योजना अनुमोदन, बालमैत्री वडा घोषणा, धरान स्वास्थ्य चौकीलाई नगर अस्पतालको रूपमा सञ्चालन गर्ने निर्णय, धरान संगीत प्रतिष्ठानमार्फत सांस्कृतिक कार्यक्रम, बाटो दर्ता तथा नामाकरण, दररेट अनुमोदन र कक्षा ११ र १२ मा नयाँ विषय थप्ने प्रस्ताव पनि छलफलका लागि तय भएका छन्।
त्यसैगरी, प्रशासनिक खर्च, मेयर–उपमेयर भिजन र कोष, वडा तथा विषयगत समितिबाट आएको बजेट पास गर्ने, प्रोत्साहन रकम, कानुन व्यवसायीलाई अनुमति, कर्मचारी संगठन संरचना, ठेक्का व्यवस्थापन र खानेपानी मुहानको थप उपयोग जस्ता विषय पनि बैठकको कार्यसूचीमा रहेका छन्।
