महोत्तरी। भूमि व्यवस्था, सहकारी तथा गरिबी निवारणमन्त्री बलराम अधिकारीले मटिहानीस्थित लक्ष्मीनारायण मठ व्यवस्थित गर्ने प्रतिबद्धता जनाउनुभएको छ ।
आज यहाँ आइपुग्नुभएका उहाँले मठको अनुगमन निरीक्षणपछि यसको सम्भार र व्यवस्थापनको तत्काल पहलकदमी लिने प्रतिबद्धता व्यक्त गर्नुभएको हो ।
“मठका भवनहरुको मर्मतसम्भार, रङ्गरोगन र तारबारसहित कर्मचारीहरुको सुविधा वृद्धिका कुरा यहाँ आएको छ”, उहाँले भन्नुभयो, “यी तत्काल गरिनुपर्ने काम देखिएका छन् । सरकारले पहलकदमी लिन्छ ।”
यसअघि मटिहानी नगरपालिकाका प्रमुख हरिप्रसाद मण्डल, मठका उत्तराधिकारी महन्थ डा रवीन्द्रदास वैष्णव र सन्तहरुले मन्त्री अधिकारीको स्वागत गर्दै यहाँका तत्काल गरिनुपर्ने कामबारे ध्यानाकर्षण गराउनुभएको थियो ।
लक्ष्मीनारायण मठ धार्मिक रितिथिति, संस्कृति र परम्पराको सम्वाहक तथा संरक्षक मानिन्छ । यसको साख जोगाइ राख्न स्थानीय तह, मठ प्रशासन र मटिहानी नगरवासीको पहिलो कर्तव्य हुने मन्त्री अधिकारीले बताउनुभयो ।रासस
