प्रिमियर आईबी कन्टिनम स्कुलले ग्लोबल हुप फेस्टअन्तर्गत अन्तरकलेज प्लस टु छात्र बास्केटबल प्रतियोगिताको उपाधि शुक्रबार जितेको छ ।
सानागाउँस्थित रोयल स्पोर्ट्स सेन्ट्रलको हलमा भएको फाइनलमा प्रिमियरले क्यापिटल कलेज एन्ड रिसर्च सेन्टर (सीसीआरसी) लाई ७९–७२ ले पराजित गर्यो । समूह चरणको खेलमा पनि प्रिमियरले सीसीआरसीलाई हराएको थियो । अपराजित रहँदै उपाधि जितेको प्रिमियरका लागि अश्विन चालिसे एक्लैले ३२ अंक जोडे ।
पहिलो क्वाटरमा १९–१४ को अग्रता लिएको प्रिमियर दोश्रोमा २०–२२ ले पछि पर्यो । प्रिमियरले तेश्रो क्वाटरमा २३–१० को अग्रता बनाउदै जितको आधार खडा गर्यो । चौथोमा सीसीआरसी २६–१७ ले अगाडि रहेपनि जितका लागि पर्याप्त भएन ।
उपाधिसंगै प्रिमियरले २५ हजार तथा उपविजेता सीसीआरसीले १० हजार नगद पुरस्कार पाए । अबाइड ग्लोबल एजुकेसन कन्सल्टेन्सी प्रा.लि. को आयोजना भएको प्रतियोगितामा फाइनलका सर्वाधिक स्कोरकर्ता अश्विन ‘मोस्ट भेलुएबल प्लेयर’ घोषित भए । उनले ५ हजार नगद पुरस्कार हात पारे । सीसीआरसीका आशालाल श्रेष्ठ उदीयमान खेलाडी चुनिए ।
विजेतालाई नेपालका लागि थाइल्यान्डका राजदूत सुवापोङ सिरिसन, अबाइडका प्रबन्ध निर्देशक मनीष श्रेष्ठ र प्रमुख कार्यकारी अधिकृत आशिष श्रेष्ठले एक कार्यक्रमबीच पुरस्कृत गरे । रोयल स्पोर्ट्स सेन्ट्रलको व्यवस्थापन र चोकोफलको सहयोगमा भएको प्रतियोगितामा ११ टिमले प्रतिस्पर्धा गरेको प्रतियोगिता संयोजक नृपेश श्रेष्ठले जनाएका छन् ।
स्वेता सदन र जिनियस विजयी
स्वेता सदन र जिनियस वल्र्डले १९ औं ग्रिनल्यान्ड अन्तर विद्यालय बास्केटबल प्रतियोगिताको सिनियर ब्वाइजमा शुक्रबार जित हात पारेका छन् ।
धापासीस्थित आयोजक ग्रिनल्यान्डको कोर्टमा स्वेता सदनले सरस्वतीलाई ४२–३३ ले पराजित गर्यो । स्वेता सदनको जितमा सुमित श्रेष्ठले २५ अंक योगदान गरे । प्रत्युश मगरको १५ अंक सहयोगमा जिनियसले तेजस्वीलाई ५१–४५ ले हरायो ।
सिनियर ब्वाइजमै टीआईएले सेबलाई ४५–३५, किङडमले जेबी स्कुललाई ४१–३७ र लालीगुराँस नेसनल एकेडेमीले एचएचसीएलाई ३७–३३ ले पाखा लगाए । टीआईएका रोशन नगरकोटीले १८, किङडमका पेम्बा तामाङले १२ र लालीगुराँसका प्राण मल्लले १२ स्कोर गरे ।
जुनियर ब्वाइजमा लालीगुराँसले हिमालयलाई १९–१० तथा बसुन्धरा नेसनल एकेडेमी (बीएनए) ले ज्ञान संस्कारलाई २६–१८ ले पन्छाए । लालीगुराँसका लक्ष्मण बुढा तथा बीएनएका सुप्रिम बस्नेतले समान ८–८ अंक बटुले ।
सिनियर गल्र्समा टीआईएले बीएनएलाई १९–१४, इडेन ब्रिज एकेडेमी (इबीए) ले ज्ञान संस्कारलाई २५–१८ र फेरिल्यान्डले क्यान्भास ऋतु बसन्तलाई १८–१० ले पराजित गरे । टीआईएकी शुभश्री सोनमले १४, इबीएकी अनामिका पटेलले १६ र फेरिल्यान्डकी करुणा बोगटीले ९ अंक जोडे ।
