इङल्यान्डको प्रतिष्ठित फुटबल लिग इङलिस प्रिमियर लिगका ठूला टिमहरुले नयाँ खेलाडीहरु भित्र्याउन होडबाजी जारी राखेका छन् । नयाँ सिजन सुरु हुनै लाग्दा खेलाडी किनबेचको समय घर्किन लागेका कारण पनि टिमहरुले पछिल्ला दिनहरुमा खेलाडी भित्र्याउन सक्रियता देखाएका छन् ।
म्यान्चेस्टर युनाइटेडले आरबी लाइपजिगका प्रभावशाली युवा खेलाडी बेन्जामिन सेस्कोलाई सात करोड ४० लाख पाउन्डमा खरिद गरेको छ । स्लोभेनियाका यी खेलाडी बिहीबार फिटनेस टेस्टका लागि ओल्ड ट्राफोर्डमा देखा पर्नेछन् । स्लोभेनियाली खेल पत्रकारहरुका अनुसार, सेस्कोलाई म्यान्चेस्टर सिटीका एर्लिङ हालान्डजस्तै शसक्त खेलाडीका रुपमा लिन सकिन्छ । उनी निकै फुर्तिला र तेज छन् ।
युनाइटेडले यसअघि नै १३ करोड पाउन्ड खर्च गरेर ब्रायन मुमो र म्याथिस कुन्हालाई भित्र्याइसकेको छ । यी तीन खेलाडी भित्रिएसँगै युनाइटेडबाट रास्मस होज्लुन्डको बिदाई पक्कापक्की छ ।
साथै, युनाइटेडका फर्वार्ड अलेक्जान्ड्रो गर्नाचो पनि बिदाई हुने सूचीमा छन् । उनलाई युनाइटेडले बिक्री गर्न चाहेको छ, र उनका लागि क्लबले पाँच करोड पाउन्ड भाउ राखेको छ । खबर अनुसार, अर्जेन्टिनी खेलाडी गर्नाचोलाई चेल्सीले भित्र्याउन प्रयास गरिरहेको छ ।
उता, २०२४–२५ को इङलिस लिग च्याम्पियन लिभरपुलबाट डार्बिन नुनेज बिदा भएका छन् । उनी साउदी क्लब अल हिलाल गएका छन् ।
