काठमाडौं । नेपाल वायुसेवा निगमका दुई वटा न्यारोबडी विमान एकपछि अर्को गर्दै बिग्रिएपछि दमाम, मुम्बई र क्वालालम्पुरका उडान रद्द भएका छन् । सोमबारयता दुईतर्फी उडान गर्ने कम्तिमा ६ सय यात्रु अलपत्र परेका छन् ।
बैंककबाट फर्केलगत्तै सोमबार निगमको सगरमाथा नामको न्यरोबडीमा इलेक्ट्रीकल समस्या देखिएको थियो । यो विमान बुधबार उडानमा ल्याइएको छ । तर उक्त विमान काठमाडौंमा थन्किएका कारण सोमबार राति दमाम उड्नुपर्ने १ सय ४५ यात्रु यतै रोकिएका थिए ।
यस्तै हङकङबाट काठमाडौंमा अवतरण भएपछि बुधबार फेरि निगमको लुम्बिनी नामको अर्को न्यरोबडीको इन्जिनसँग सम्बन्धित खराबी आएको छ ।
यो विमान बिग्रिएका कारण बुधबार दिउँसो भारतको मुम्बई जानुपर्ने ८७ जना काठमाडौंमा रोकिएका थिए भने ९२ जना काठमाडौंमा आउनुपर्ने यात्रु उतै रोकिएका थिए । ३५ जना जानैपर्ने यात्रुलाई निगमले अरु वायुसेवा तथा उडानबाट दिल्ली हुँदै पठाइएको छ ।
यता मंगलबार मलेसियाको राजधानी क्वालालमपुर जानुपर्ने यात्रु पनि निगमको उडान कटौती हुँदा दुवैतर्फ अलपत्र परेका छन् । काठमाडौंबाट जाने १ सय २६ र नेपाल फर्किनुपर्ने १ सय ३५ यात्रु न्यरोबडी नउड्दा दुवैतर्फ रोकिएका छन् ।
