सुर्खेत। कर्णाली प्रदेशका मुख्यमन्त्री यामलाल कँडेलले कर्मचारीलाई परम्परागत शैली त्यागेर नागरिकमुखी सेवामा केन्द्रित हुन निर्देशन दिएका छन्।
आइतबार आन्तरिक मामिला तथा कानुन मन्त्रालयको वार्षिक समीक्षा कार्यक्रममा बोल्दै मुख्यमन्त्री कँडेलले मन्त्रालय जनताको सेवामा खटिने थलो हो भन्ने सोचका साथ काम गर्नुपर्नेमा जोड दिए।
उनले मन्त्रालयलाई “दुःख दिने अड्डा” होइन, “सेवाग्राहीलाई सहजीकरण गर्ने थलो” का रूपमा बुझ्न आग्रह गर्दै भने, “यहाँको जिम्मेवारी सम्हालेपछि म पनि सेवक हुँ, शासक होइन भन्ने हेक्का राखेको छु। तपाईँहरूबाट पनि त्यस्तै व्यवहारको अपेक्षा गर्दछु।”
कँडेलले नीतिगत तहमा मन्त्रीहरूको सहजीकरण भए पनि नागरिकसँग प्रत्यक्ष सरोकार राख्ने काम कर्मचारीको हातमा हुने भएकाले, सेवाग्राहीप्रति जिम्मेवार बन्न आग्रह गरे। उनले भने, “नागरिकले सरकारी निकायबाट नयाँ ढङ्गको सेवा खोजिरहेका छन्। अब नेतृत्व पदको भरमा होइन, कार्यसम्पादन र नैतिकताको आधारमा गरिनुपर्छ।”
मुख्यमन्त्री कँडेलले केही कर्मचारीले नियमनअनुसार गर्न सकिने कामसमेत पन्छ्याउने प्रवृत्ति देखाएको गुनासो गर्दै सो प्रवृत्तिमा सुधार ल्याउन चेतावनी दिए। “काम गर्न सक्नुहुन्न भने आफ्नो भूमिकाबारे अहिले नै सोच्नुहोस्,” उनले भने, “काम रोक्ने होइन, नियमसंगत ढंगले पूरा गर्ने हो।”
कार्यक्रममा मन्त्रालयका सचिव डा. पुष्पराज शाहीले पत्रकार स्वास्थ्य बीमा, नागरिक घर बीमा, र विपद् पीडित राहत वितरणजस्ता कार्यक्रम सञ्चालन गरिएको जानकारी दिए। यस वर्ष मन्त्रालयको कूल प्रगति ७१ प्रतिशत रहेको उनले बताए।
