भक्तपुर। वीर अस्पतालको १३६औँ स्थापना दिवसका अवसरमा आज सूर्यविनायक नगरपालिका–७ गुण्डुमा आयोजित बृहत् निःशुल्क स्वास्थ शिविरमा एक हजार ४६३ जनाले लाभ लिएका छन् ।
अस्पतालका निर्देशक प्रा डा दीलिप शर्माको नेतृत्वमा गुण्डुस्थित हिमाल एकेडेमीमा आयोजित शिविरमा विभिन्न २६ रोगका ३५ जना विशेषज्ञ चिकित्सिक एवं स्वास्थ्यकर्मीको टोलीले बिरामीको स्वास्थ्य परीक्षण गरेको वडा नं ७ का अध्यक्ष रवीन्द्र सापकोटाले जानकारी दिनुभयो ।
शिविरमा सामान्य चिकित्सा सेवा, पेटरोग, मुटुरोग, छाती एवं फोक्सो रोग, नशा रोग, मानसिक रोग, मधेमेह, थाराइड, कलेजो रोग, सामान्य शल्यक्रिया, नाक, कान, घाँटी, आँखा, छाला, दाँत, हाडजोर्नी, स्त्रीरोग, बालरोग, क्यान्सर रोग, मिर्गौला रोग, इसिजी, भिडियो एक्सरे, युरोलोजी, ज्येष्ठ नागरिक सेवालगायतका विभिन्न सेवा प्रदान गरिएको थियो । बिरामीलाई निःशुल्क औषधिसमेत वितरण गरिएको थियो । रासस
