काठमाडौँ । नेकपा (एकीकृत समाजवादी) का महासचिव घनश्याम भुसालले मुलुकमा सुशासन कायम हुन नसकेकै कारण गरिबी, बेरोजगारी र घुसखोरी बढेको बताउनुभएको छ ।
पुष्पलाल स्मृति दिवसका अवसरमा मंगलवार काठमाडौंमा आयोजित र्काक्रमलाई सम्बोधन गर्दै महासचिव भुसालले पटक–पटक भएका आन्दोलनबाट व्यवस्था परिवर्तन भएपनि सुशासन कायम हुन नसकेको बताउनुभएको हो । भ्रष्टाचारको अन्त्य गर्दै मुलुकमा सुशासन कायम गर्न बासी भएपनि कम्युनिष्ट आन्दोलनको अझै आवश्यकता रहेको उहाँको भनाइ छ । उहाँले मुलुकमा सबै सम्भव भएपनि घुस खान नसकिने राज्य बनाउन जटिल रहेको बताउनु भयो । उहाँले संविधान र निर्वाचन प्रणालीलाई देखाएर राजनीतिक दलहरु जनताको प्रश्नबाट भाग्न खोजिरहेको आरोप पनि लगाउनु भयो । उहाँले घुस नखानको लागि निर्वाचन आयोगले रोकेको हो ? भन्दै प्रश्न समेत गर्नुभयो ।
उहाँले भन्नुभयो, ‘आज सुशासन छैन । दलाल पूँजीवाद छ । त्यसको कारण आज रोजगारी छैन । मुलुकमा कुशासन हिजो पनि थियो । आज पनि छ । बेरोजगारी बढ्दै गएको छ । त्यसकारण हाम्रो क्रान्तीकारी आन्दोलन बासी भएपनि अझै पनि बाँकी छ । हामी घुस खान नसकिने पार्टी, राज्य कहिले बनाउँछौं ? त्यस्तो राज्य बनाउन सकिएला कि नसकिएला ? यो प्रश्न असाधारण प्रश्न हो लाग्छ । अहिले संविधानको कुरा छ । म यसलाई बबुरो संविधान भन्न थालेको छु । राजनीतिका नालायकीहरुलाई संविधानमा फालिए । के ले भएन भन्दा निर्वाचनले दिएन, संविधानले दिएन । तपाईलाई घुस नखानको लागि निर्वाचनले रोकेको हो ? तपाईलाई गुटबन्दी नगर्नको लागि संविधानले रोकेको हो । गुटबन्दीको लागि मान्छेको खुट्टा तानातान गर्न, अंक गणित बनाउन चाकर गर्न र राजनीति भनेको केवल कुर्सीको खेल हो भन्ने साबित गर्नको लागि संविधानले रोकेको हो ? वाध्य पारेको हो ? किन भएन भन्दा संविधानले दिएन भनेर सजिलो भएको छ मान्छेलाई । ’
उहाँले संविधान र निर्वाचन प्रणालीलाई देखाएर राजनीतिक दलहरु भाग्न खोजिरहेको आरोप पनि लगाउनु भयो ।
