विराटनगर । सिधाकुरा डटकमको ‘डार्क फाइल’ कार्यक्रमलाई फेक अडियो उपलब्ध गराएको अभियोगमा राजकुमार तिमल्सिना पक्राउ परेका छन् ।
सर्वोच्च अदालतका न्यायाधीश, कानुन व्यवसायी र सञ्चार उद्यमीलाई जोडेर फेक अडियो बनाएको घटनामा अदालतबाट ६ महिना कैदको फैसला भएका तिम्सिनालाई आइतबार प्रहरीले इटहरीबाट पक्राउ गरेको हो ।
सर्वोच्च अदालतले उनलाई दोषी ठहर गर्दै गत असोजमा ६ महिना सजाय तोकेको थियो । अदालतले यस प्रकरणमा दुई पत्रकारलाई सर्तसहित ३ महिनाको कैद सजाय सुनाएको थियो भने तिमल्सिनालाई सर्त विना ६ महिना सुनाइएको थियो । अदालतको फैसलापछि उनी फरार थिए ।
इटहरी–५ पचरुकीमा महिलाबीचको लेनदेन विवादमा जोडिएपछि तिम्सिना पक्राउ परेका थिए । पक्राउ परिसकेपछि मात्रै उनको वास्तविक परिचय खुलेको इलाका प्रहरी कार्यालय इटहरीका डीएसपी लक्ष्मी भण्डारीले जानकारी दिए ।
तिम्सिनालाई फैसला कार्यान्वयनका लागि कारागार पठाउने तयारी भइरहेको डीएसपी भण्डारीले बताए ।
