काठमाडौं । नेपाली संगीत क्षेत्रका वरिष्ठ संगीतकार शम्भुजीत बासकोटालाई दीर्घ साधना सम्मानबाट सम्मान गरिएको छ । ‘नेसनल म्युजिक अवाडर्् २०८१ मा उनलाई सम्मान गरिएको हो ।
रेडियो कान्तिपुरले शनिबार गोदावरी सनराइज कन्भेन्सन सेन्टरमा आयोजना गरेको अवार्डस्मा १४ विधामा अवार्ड वितरणसँगै कन्सर्ट सम्पन्न भयो ।
चलचित्रका ३ सय ७५ र २ हजार बढी गीतमा संगीत भरिसकेका शम्भुजीतलाई संगीत सम्राटको उपनाम दिँदै नगद एक लाखसहित सम्मान गरिएको हो ।
रेडियो कान्तिपुरका स्टेसन म्यानेजर पवन आचार्यले साँढे पाँच दशक संगीतमा अनवरत लाग्नुभएका संगीत सम्राट शम्भुजीत बासकोटालाई दीर्घ साधना सम्मान प्रदान गरिएको बताए ।
सम्मानपछि संगीतकार बासकोटाले नेपाली संगीतले देशलाई विश्वमा चिनाउन ठूलो भूमिका खेल्ने बताए । ‘नेपाली संगीत, कला र साहित्य विश्वको त्यो चुलीमा पुग्नेछ । देशलाई चिनाउन ठूलो भूमिका संगीतले नै गर्नेछ । संगीत मेरो जीवनको लामो यात्रा हो, उकाली, ओराली हो । लाइफटाइम अचिभमेन्टका लागि धन्यवाद । अनुशासनमा बसेर गरिएको संगीत विश्वमा पुग्नेछ,’ शम्भुजीतले भने ।
कार्यक्रममा गायिका अस्मिता अधिकारी र सुरेश लामाले शम्भुजीत लाई ‘यो जीन्दगीले’, ‘म त अब रिसाउँछु’, ‘सुनकोशी सुसेलेको’, ‘तिम्रो मन त चक्कु छुरी’ गाउँदै ‘ट्रिब्युट’ गरे ।
अवार्डतर्फ गायक आरसी रिमालले ‘उत्कृष्ट डेब्यु सिंगर’को विधामा जित हासिल गरे । त्यस्तै, ’उत्कृष्ट लोकदोहोरी गायिका’ को अवार्ड शान्ति श्री परियारले जितिन् ।
त्यस्तै ‘उत्कृष्ट लोकदोहोरी गायक‘को अवार्ड गायक प्रकाश दुतराजले जिते । यो विधामा शिरिष देवकोटा, मौषम गुरुङ, खेम सेञ्चुरी र विश्व दोङ मनोनयनमा थिए ।
‘उत्कृष्ट गीतकार’को अवार्ड भने भूषण खरेलले जिते । ‘उत्कृष्ट आधुनिक गायिका’को अवार्ड ‘ए जिन्दगी’बोलको गीतबाट गायिका टिका प्रसाईंले जितिन् । यसैगरी ‘उत्कृष्ट आधुनिक गायक’को अवार्ड गायक शिव परियार ‘चुपचाप’बोलको गीतबाट जिते । ‘उत्कृष्ट पाश्र्व गायक’को अवार्ड भने ‘रुकुम मैकोट’बाट एसडी योगीले जिते । ‘उत्कृष्ट पाश्र्व गायिका’को अवार्ड समीक्षा अधिकारीले ‘बोक्सीको घर’को गीत ‘बुझिन मैले’बाट जितेकी छन् ।
कार्यक्रममा सन्जीव बराइली ‘उत्कृष्ट संगीतकार’ घोषित भए । ‘कुम: सागर एण्ड ख्वप’ ब्यान्ड’ एनएमएमा ‘उत्कृष्ट ब्यान्ड’ घोषित भयो ।
यो वर्षबाट थप गरेको ‘हिपहप, आर एण्ड बी’ विधामा ब्रिजेश श्रेष्ठले ‘मुटुमै बसेछ’ बोलको गीतबाट अवार्ड जिते ।
गायिका त्रिशला गुरुङ कार्यक्रममा ‘उत्कृष्ट पप गायिका’ घोषित भइन् । गायक सुशान्त केसीले ‘बार्दली’बाट ‘उत्कृष्ट पप गायक’को अवार्ड जिते ।
यही गीतबाट सुशान्तले ‘पिपुल च्वाइस अवार्ड’ पनि जिते ।
