काठमाडौं । गत जेठ २८ गते भएको एयर इन्डिया विमान दुर्घटना फ्लू कन्ट्रोल स्विच अफ हुँदा भएको निष्कर्ष आएको छ ।
विमान उडानको समयमा कोपाइलटले चलाएको र मूल क्याप्टेनले मनिटरिङ गरिरहेको रिपोर्टबाट देखिएको छ । रिपोर्ट अनुसार फ्युल कन्ट्रोल स्विच ‘कट अफ’ पोजिसनमा रहेको प्रारम्भिक रिपोर्टमा देखिएको छ । ककपिटमा रेकर्ड भएको स्वरको टुक्राले यो अनुमान भएको हो ।
सार्वजनिक भएको प्रतिवेदनमा भनिएको छ– ‘किन उसले कट अफ गरेको ?’ रेकर्ड भएको आवाजमा भनिएको छ । दुर्घटनामा २६० जना यात्रुको ज्यान गएको थियो ।
प्रारम्भिक रिपोर्ट बाहिर आएपछि एयर इन्डियाले विज्ञप्ति जारी गर्दै सबै सरोकारकलासँग समन्वय गर्ने जनाएको छ । एयर इन्डियाले मृतकको परिवारको दु:खमा आफ्नो पनि साथ रहेको बताएको छ ।
१५ पृष्ठ लामो रिपोर्टमा विमानले पूर्ण गति लिएपछि एक सेकेन्डको अन्तरमा इन्जिन १ र इन्जिन २ को स्विच रनबाट कटअफ पोजिसनमा गएको थियो । त्यसपछि पाइलटको आवाज ककपिटमा रेकर्ड भएको हो । चार सेकेन्डको फरकमा दुवै इन्जिनको स्विच कट अफबाट रनमा सरेको छ । त्यसको केही मिनेटपछि एक पाइलटले ‘मे डे मे डे मे’ भनेका थिए । त्यसको लगत्तै विमान विस्फोटको आवाज आएको थियो ।
भारतको अहमदाबादस्थित सरदार वल्लभभाइ पटेल अन्तर्राष्ट्रिय विमानस्थलबाट लन्डनको ग्याटविक विमानस्थल जान २३० यात्रु र १२ कर्मचारी लिएर उडेको एयर इन्डियाको विमान धावनमार्गबाट ‘टेकअफ’ गरेलगत्तै नजिकैको मेडिकल कलेजको होस्टलमा बजारिन पुगेको थियो । विमानका एक यात्रु जीवितै भेटिएका थिए भने होस्टलका केही विद्यार्थीको मृत्यु भएको थियो ।
उडान नम्बर एआई–१७१ को भीटी–एएनबी ‘रजिस्ट्रेसन’ रहेको बोइङको ड्रिमलाइनर ७८७ विमान होस्टलको भवनमा बजारिएर दुई टुक्रा भएको थियो । विमानको अगाडिको भाग भुइँमा खसेर आगो लागेको थियो । पछिल्लो हिस्सा भने भवनमै अड्किएको छ । पौने १० घण्टा उडानका लागि विमानले १ लाख २५ हजार लिटर इन्धन बोकेको थियो ।
विश्वभर विमानको ‘लाइभ ट्र्याकिङ’ गर्ने अनलाइन पोर्टल ‘फ्लाइटराडार २४’ का अनुसार उडान भरेको एक मिनेटमै जहाजको सिग्नल हराएको थियो । ६२५ फिटको उचाइमा पुग्नेबित्तिकै जहाज दुर्घटनामा परेको हो । पाइलटले एयर ट्राफिक कन्ट्रोललाई ‘मेडे’ भनेर कलसमेत गरेका थिए । ‘एयर ट्राफिक कन्ट्रोल’ ले त्यसमा तत्काल प्रतिक्रिया जनाए पनि त्यसपछि कुनै जवाफ नआएको भारतको नागरिक उड्डयन नियमनकारी निकायले जनाएको छ । ‘मेडे’ उद्घोष अप्ठ्यारोमा परेका विमानले सहयोग माग्न प्रयोग गर्ने शब्दावली हो ।
