काठमाडाैंः नेपाली उद्याेगी व्यवसायीकाे सबैभन्दा ठूलाे छाता संस्था नेपाल उद्योग वाणिज्य महासंघको निर्वाचन साउन २५ र २६ गते हुने भएको छ । महासंघकाे आइतबार बसेको पदाधिकारीको बैठकले साधारणसभाको मिति प्रस्ताव गरेको थियाे ।
सोमबार बस्ने कार्यसमितिको बैठकले अन्तिम निर्णय गर्ने तथा साधारणसभा काठमाडौंमा हुनेछ ।
साउन २१ गतेसम्म सरकारको लकडाउन रहेकोले २५ र २६ गते साधारणसभाको मिति तय गरिएको हाे ।
कोरोना भाइरस संक्रमणको जोखिम अधिक भएमा वा सरकारले लकडाउन जारी राखेमा पदाधिकारीको बैठकले साधारणासभाको मिति सार्न सक्ने महासंघकाे भनाइ छ ।
गत चैत २९ र ३० गते तय भएको महासंघको चुनावी साधारणसभा कोभिड–१९ का कारण स्थगित भएको थियो ।
निर्वाचनमा बरिष्ठ उपाध्यक्ष पदमा चन्द्रप्रसाद ढकाल र किशोर कुमार प्रधानबीच प्रतिस्पर्धा हुँदैछ ।
जिल्ला उपाध्यक्षमा गुणनिधी तिवारी र दिनेश श्रेष्ठ तथा वस्तुगत उपाध्यक्षमा अञ्जन श्रेष्ठ र उमेशलाल श्रेष्ठबीच प्रतिस्पिर्धा हुँदैछ ।
एसोशिएट उपाध्यक्षमा सौरभ ज्योति र रामचन्द्र संघाईबीच प्रतिस्पर्धा हुँदैछ ।
निर्वाचनपछि वर्तमान वरिष्ठ उपाध्यक्ष शेखर गोल्छा स्वातः अध्यक्ष बन्नेछन् । काेषाध्यक्षको चयन निर्वाचित कार्यसमितिले चयन गर्नेछ ।
