काठमाडौँ । कानून न्याय तथा संसदीय मामिलामन्त्री अजयकुमार चौरसियाले स्वतन्त्र सांसद अमरेशकुमार सिंहलाई आफूमाथि लगाएको आरोप प्रमाणित गर्न चुनौति दिनुभएको छ ।
प्रतिनिधि सभाको सोमवारको बैठकमा बोल्दै मन्त्री चौरसियाले यस्तो चुनौती दिनुभएको हो । सांसद सिंहले मन्त्री चौरसियाले न्यायाधीशहरूलाई फोन गरेर न्याय प्रभावित पार्न खोजेको आफूसँग प्रमाण रहेको भन्दै कल विवरण सार्वजनिक गर्न माग गर्नुभएको थियो । मन्त्री चौरसियाले बाहिर आएजस्तो दलीय प्रभाव पर्नेगरी न्यायाधीश नियुक्ति नगरिएको उहाँको भनाइ छ । उहाँले आफूले नैतिकता र चरित्रमा आधारित राजनीतिक जीवन बिताएको दाबी गर्दै खहरे खोलाजस्तो अनुशासनहिन नभएको जिकिर गर्नुभयो ।
मन्त्री चौरसियाले भन्नुभयो, ‘संविधान र कानूनभन्दा बाहिर गएर न्यायाधीश नियुक्ति नभएको र माननीय सदस्यज्यूले भनेजस्तो पार्टीको सिण्डिकेट तथा दलीय प्रभाव गर्नेगरी न्यायाधीश नियुक्ति गरिएको छैन । माननीयज्यूले मेरो बारेमा पनि केही कुरा उठाउनु भएको छ । न्यायिक परामर्श कानून, न्याय तथा संसदीय मामिलामन्त्री र मन्त्रालयको कार्यक्षेत्रभित्र पर्छ कि पर्दैन ? म उहाँलाई प्रश्न सोध्न चाहान्छु । उहाँले मलाई आरोप पनि लगाउनु भएको छ । मेरो राजनीतिक जीवनमा नैतिकता र चरित्रको राजनीति गरेको व्यक्ति हुँ । म कहिल्लै पनि आफूलाई खहरे खोलाजस्तो अनुशासनहिन र उडिरहेको चंगाबाट चुँडिएपछि रुप र घरमा खसेजस्तो व्यक्तित्व मेरो होइन । मेरो विरुद्धमा उहाँसँग कुनै प्रमाण छ भने पेश गरे हुन्छ ।’
उहाँले न्यायाधीश नियुक्तिमा कुनै सिण्डिकेट वा दलीय प्रभाव नपरेको समेत स्पष्ट पार्नुभयो ।
