काठमाडौं । नेकपा एमालेका सचिवसमेत रहका सांसद योगेश भट्टराईले विपक्षीको अवरोधका बीच सभामुख देवराज घिमिरेले प्रतिनिधि सभा बैठक चलाएको घटनाको बचाउ गरेका छन् ।
विपक्षी दल रास्वपाको अवरोध र बेलघेराउका बीच सभामुख घिमिरेले प्रतिनिधि सभा बैठक चलाउँदै आएका छन् । यसको विरोध हुँदै आएको छ ।
तर, एमाले सचिव भट्टराईले भने आज सामाजिक सञ्जालमा सभामुखको बचाउ गरेका छन् । उनले अडानका नाममा प्रक्रियालाई बन्धक नबनाउन समेत आग्रह गरेका छन् ।
सचिव भट्टराईले के भनेका छन् त ?
सभामुखका बारेमा सुविधा अनुसारको व्याख्या ?
नाराबाजीका बीचमा संसद चल्नु राम्रो होईन तर के यो पहिलो चलेको पटक हो त? विगतका प्रत्येक सभामुखका पालामा कुनै न कुनै दलले वेलमा नारा लगाएकै थिए । वर्तमान सभामुखका बारेमा टिप्पणी गर्ने मीडिया वा महानुभावले पहिलेका सभामुखका बारेमा के लेखिएको थियो? के बोलिएको थियो? एकपटक आफैलाई ऐनामा हेर्ने हो की ?
कस्ता विषयमा बैठक अवरुद्ध गर्ने ? सबैको सहमती कसरी बनाउने? सहमतीको न्यूनतम आधार केलाई बनाउने? बहुलवादी समाज र बहुदलीय प्रणाली भएका मुलुकमा हरेक बिषयमा सबैको सहमती हुनै पर्छ भन्ने ग्यारेन्टी कस्ले गर्न सक्छ? बहुमत र अल्पमतको अभ्यास कसरी गर्ने?
आउनुहोस छलफल गरौ । सकेसम्म सर्बस्वीकार्य प्रणाली स्थापित गरौ । अड़ानका नाममा प्रक्रियालाई बन्धक नबनाऊ । दोसी सभामुख हो की हाम्रो ईगो?
