काठमाडौँ । प्रतिपक्षी दलको बैठक बसिरहेको छ । संघीय संसद भवन नयाँ बानेश्वरमा प्रतिपक्षी दलहरुबीच केहीबेर अघिदेखि छलफल सुरू भएको हो ।
छलफलमा नेकपा (माओवादी केन्द्र), राप्ट्रिय स्वतन्त्र पार्टी र नेकपा (एकीकृत समाजवादी)का नेताहरू सहभागी छन् ।
बैठकमा माओवादी केन्द्रका उपमहासचिव वर्षमान पुन, प्रमुख सचेतक हितराज पाण्डे, रास्वपाका प्रमुख सचेतक सन्तोष परियार, एकीकृत समाजवादीका वरिष्ठ उपाध्यक्ष राजेन्द्र पाण्डे, आम जनता पार्टीका अध्यक्ष प्रभु साहलगायत सहभागी छन् ।
भिजिट भिसा प्रकरणमा गृहमन्त्रीको राजीनामा, छानबिन समिति गठनको माग गर्दै प्रतीपक्षले लामो समयदेखि प्रतिनिधि सभा बैठक चल्न दिएका छैनन् ।
संसदको अवरोध खुलाउनका लागि रास्वपाले पाँच बुँदासहितको प्रस्ताव तयार पारेको छ । सोही प्रस्तावबारे साझा धारणा बनाउन प्रतिपक्षी दलहरुको बैठक बसिरहेको बुझिएको छ ।
प्रतिनिधि सभा बैठक दिउँसो १ बजेका लागि बोलाइएको छ ।
