कोभिड–१९ खोप आवश्यकताका विरुद्धमा प्रदर्शनकारीहरू पश्चिमी यूरोपभर सडकमा उत्रिएका छन् र फ्रान्समा मात्रै एक लाखभन्दा बढी मानिसले खोप नगरिएकाहरूको अधिकारलाई प्रतिबन्ध लगाउने सरकारको योजनाको विरोध गर्न जुलुस निकालेका छन्।
फ्रान्सेली राजधानी पेरिसमा प्रदर्शनकारीहरू अधिकांशले मास्क नलगाई शनिबार चिसो र वर्षाको सामना गर्दै ‘सत्य’, ‘स्वतन्त्रता’ र ‘नो टु भ्याक्सिन पास’ लेखिएका प्लेकार्डहरू बोकेका थिए।
फ्रान्सले शुक्रबार एकै दिनमा तीन लाखभन्दा बढी कोभिड–१९ सङ्क्रमण रेकर्ड गरेको छ । देशको तल्लो सदनले बिहीबार एक सरकारी विधेयकलाई अनुमोदन गरेको छ जसमा व्यक्तिहरूले खाना खान, यात्रा गर्नुअघि र इन्टरसिटी ट्रेनहरूमा वा सांस्कृतिक कार्यक्रमहरूमा भाग लिनुअघि कोरोनाभाइरस विरुद्ध पूर्णरूपमा खोप लगाएको प्रमाणित गर्नुपर्नेछ।
सरकारले नयाँ आवश्यकताहरू जनवरी १५ सम्म लागू हुने अपेक्षा गरेको छ । यद्यपि सिनेटका विधायकहरूले अब प्रक्रियामा ढिलाइ गर्न सक्छन्।
फ्रान्सेली गृह मन्त्रालयले फ्रान्समा शनिबारको प्रदर्शनमा एक लाख पाँच हजार २०० जनाले भाग लिएको जनाएको छ । तीमध्ये १८ हजार राजधानी पेरिसमा थिए र जहाँ पुलिसले १० जनालाई गिरफ्तार गरेको थियो भने तीन अधिकारी सामान्य घाइते भएका थिए । अन्यत्र २४ जनालाई पक्राउ गरिएको र सात प्रहरी सामान्य घाइते भएको मन्त्रालयले जनाएको छ ।
अस्ट्रियाको राजधानी भियनामा पनि ४० हजारभन्दा बढी मानिसले विरोध प्रदर्शन गरे । त्यहाँ कोभिड–१९ विरुद्धको खोप अर्को महिनादेखि अनिवार्य हुने तय गरिएको छ। त्यहाँ प्रदर्शन शान्तिपूर्ण रहेको प्रहरीले जनाएको छ ।
जर्मनीमा, प्रदर्शनकारीहरूले शनिबार धेरै शहरहरूमा जुलुस निकाले । प्रहरीका अनुसार ह्याम्बर्गमा लगभग १६ हजार मानिसहरू उपस्थित थिए।
सामान्य खोप आदेश लागू गर्ने विचार गरिरहेको जर्मनीले गत महिना पाँचदेखि ११ वर्ष उमेर समूहका बालबालिकालाई कोभिड–१९ विरुद्धको खोप दिन थालेको छ ।
इटालीमा पनि विरोध प्रदर्शनहरू भएका छन् । टुरिन शहरका सयौँ मानिसले ५० वर्षभन्दा माथिका जो कोहीलाई पनि खोप अनिवार्य बनाउने नियमहरूको विरूद्ध विरोध गरे।
इटालीमा अन्य उमेर समूहका लागि पनि कडा कानून लागू गरिएको छ । त्यहाँ सोमबारदेखि खोप नलगाएकाले सार्वजनिक यातायात प्रयोग गर्न वा रेस्टुरेन्टहरू भ्रमण गर्न सक्ने छैनन् । एजेन्सी
