एजेन्सी । भारतले आधिकारिक रूपमा जापानलाई उछिनेर विश्वको चौथो ठूलो अर्थतन्त्र भएको देश बनेको छ ।
नीति आयोगका सीईओ बीभीआर सुब्रह्मण्यमले पत्रकार सम्मेलनमा यो जानकारी दिएका हुन् । भारतले आफ्नो आर्थिक नीतिका कारण यो उपलब्धि हासिल गरेको हो ।
अन्तर्राष्ट्रिय मुद्रा कोष (आईएमएफ)को तथ्याङ्क उद्धृत गर्दै सुब्रह्मण्यमले भने, ‘हामी चौथो ठूलो अर्थतन्त्र हौं। हामी ४ ट्रिलियन डलरको अर्थतन्त्र हौं । आज भारत जापानभन्दा ठूलो छ । अब अमेरिका, चीन र जर्मनी मात्र भारतभन्दा ठूला छन् ।’
आईएमएफको अप्रिल २०२५ को विश्व आर्थिक दृष्टिकोण प्रतिवेदन अनुसार, भारतको जिडीपी (४.१८७) ट्रिलियन पुग्ने अनुमान गरिएको छ, जुन जापानको (४.१८६) ट्रिलियनको अनुमानित जिडीपी भन्दा अलि बढी हो ।
भारतको यो उपलब्धि बलियो घरेलु माग, अनुकूल जनसांख्यिकीय प्रवृत्ति र नीतिगत सुधारका कारण हो । भारतको अर्थतन्त्रले वार्षिक ६.७ प्रतिशतको वृद्धि दर कायम राखेको छ, जबकि जापानको अर्थतन्त्र विश्वव्यापी व्यापार तनाव र नीतिगत परिवर्तनका कारण प्रभावित भएको छ ।
