काठमाडौँ । भिजिट भिसामा सेटिङ गरेर मानव बेचविखन गरेको अभियोगमा उजुरी परेपछि त्रिभुवन विमानस्थल अध्यागमनका ९ कर्मचारीको सरुवा गरिएको छ ।
भिजिट भिसामा बदमासी गरेको उजुरी गृह मन्त्रालय र अख्तियार दुरुपयोग अनुसन्धान आयोगमा पुगेपछि उनीहरुलाई गत मंगलबार नै सरुवा गरिएको छ । गृहमन्त्री रमेश लेखक स्तरीय निर्णयबाट प्रमुख अध्यागमन अधिकृत (सहसचिव) तिर्थराज भट्टराईसहित तीन नायब सुब्बा, ४ कम्प्युटर अपरेटर र एक सहायक कम्प्युटर अपरेटरको सरुवा गरिएको हो ।
अख्तियारले उनीहरूको सरुवा भएको अर्को दिन बुधवार त्रिभुवन अन्तर्राष्ट्रिय विमानस्थल अध्यागमन कार्यालयमा छापा मारेको थियो । सोहिक्रममा प्रमुख अध्यागमन अधिकृत भट्टराईलाई बुधबार नियन्त्रणमा लिएर सामान्य सोधपुछपछि छोडेको थियो । उनको मोबाइल भने नियन्त्रणमा लिएर फरेन्सिक ल्यावमा परीक्षण भईरहेको छ ।
भट्टराईलाई नियन्त्रणमा लिनुअघि गृहमन्त्री लेखकले उनको सरुवा गरेर मन्त्रालय तानेका थिए । सरुवा गरिएका अन्य तीन नायब सुब्बामध्य प्रेमप्रसाद पौडेलको जिल्ला प्रशासन कार्यालय काठमाडौँ, वीरभद्र जोशीको जिल्ला प्रशासन कार्यालय काठमाडौँ, तथा नरबहादुर थापाको जिल्ला प्रशासन कार्यालय बाँकेमा सरुवा गरिएको छ ।
यस्तै, कम्प्युटर अपरेटरहरू उदेन सुवेदी, प्रदीपकुमार यादव, पवन गुरुङ, र धनराज उपाध्यायको कारागार व्यवस्थापन विभाग वा अन्तर्गत सरुवा गरिएको छ भने सहायक कम्प्युटर अपरेटर कमला श्रेष्ठको कारागार व्यवस्थापन विभागअन्तर्गत सरुवा गरिएको छ ।
