काठमाडौँ: हिजोका मिडियाका समाचारले भनेजस्तो भएको भए यतिबेला नयाँ सरकार बनिसकेको हुन्थ्यो । हिजो साँझका लागि बोलाइएको मन्त्रिपरिषदको बैठक नबसेपछिका समाचारहरु यही लाइनमा आएका थिए ।
साँझका अनलाइनदेखि बिहानका अखबारका शीर्षक थिए‐ गभर्नरका कारण सत्तामा संकट, गभर्नरमा दुवैको दाबीपछि ओली देउवा बस्न मानेनन्, ओलीले विश्व पौडेलेको योग्यता नपुगेको भनेपछि गभर्नर नियुक्त हुन सकेन आदि आदि ।
तर वास्तविकता भने त्यस्तो थिएन, समाचारमात्र थियो । पछिल्लो समय वास्तविकता र समाचारमा फरक हुने गरेको गुनासो बालुवाटार र बुढानीलकण्ठको छ । जस्तो कि हिजोको मन्त्रिपरिषदको बैठक प्रधानमन्त्री विरामी भएर हुन नसकेको र आफू आराम गर्ने भनेपछि बालुवाटार देउवा नगएको वास्तविकताको ठिक उल्टो गरी समाचार आएको बालुवाटारको भनाई छ ।
यसै विषयलाई गभर्नरमा कुरा नमिलेपछि मन्त्रिपरिषद बस्न नसकेको र अर्कातर्फ गभर्नरका विषयमा सल्लाह गर्न भनेर प्रधानमन्त्रीले बोलाएपछि एउटै विषयमा कति कुरा गर्ने भनेर कांग्रेस सभापति शेरबहादुर देउवा बालुवाटार नगएका भन्ने जस्ता समाचारका आज बुढानीलकण्ठ पूरै खण्डन गर्दछ ।
कांग्रेसकै एक समाचार स्रोतले भन्यो‐ केही बिग्रिएकै थिएन । किनभने विश्व पौडेललाई गभर्नर नियुक्त गर्ने सल्लाह प्रधानमन्त्री ओली र कांग्रेस सभापति देउवाको मिलेपछि नै उनले सिफारिश समितिबाट राजीनामा दिएका थिए । तर पनि मिडियामा भने धेरै कुरा आए ।
प्रतिपक्षी माओवादीले त गभर्नरमा लफडा परेकाले वर्तमान सत्ता गठबन्धन भत्किनै लागेको भनेर आफ्नो पार्टी भित्र सञ्चार गरिरहेकै थियो । यतिसम्म कि आफ्नै कामले देउवा भेट्न पुगेका माओवादी नेता जनार्दन शर्माले पनि कांग्रेस माओवादीको सरकारका बारेमा कुराकानी गरेका भनेर समेत प्रचार गरिएको थियो ।
वर्तमान कांग्रेस एमालेको सत्ता भत्किने र माओवादीको प्रवेशसहित कांग्रेसको नेतृत्वमा सरकार बन्ने प्रचार हुन थालेको यो सरकार बनेकै हप्तादेखि हो । समय समयमा त्यो योजनाको भोल्युम बढ्छ र समयमा घट्दै गएर शिथिल पनि बन्छ । त्यस्तो अवस्था यसअघि पनि पटक पटक आएको हो जसरी गभर्नरको नियुक्ति हुन नसक्दा आएको थियो ।
संख्याका हिसाबले हेर्दा यो सरकारमाथि घुनपुत्लो लाग्ने आधार भेटिँदैन । तर सामाजिक सञ्जाल र अनलाइन मिडियाका समाचार चाहार्ने हो भने सरकारको आयु घन्टामा काउन्टडाउन गर्नुपर्ने जस्तो देखिन्छ । यी दुवैको बीचबाट ओली देउवाको सम्बन्धको मापन गर्ने हो भने उहाँहरु दुवै जना सरकारप्रति कन्फिीडेन्ट देखिनुहुन्छ । त्यसो भए भएको के त ?
भएको चाहिँ सरकार ढाल्नैपर्ने प्रमुख विपक्षी माओवादीका अध्यक्षको हतारो हो । उहाँले आफ्ना कार्यकर्तालाई इङ्गेज गराउनुपर्नेछ, त्यसका लागि यो सरकार आजै या भोलिसम्म ढल्छ भन्ने हो । यो प्रतिपक्षको धर्म पनि हो ।
जबजब सत्तामा अविश्वास बढ्न थालेजस्तो देखिन्छ अर्थात कुनै नियुक्ति आदिमा असमझ्दारी भएको कुरा बाहिर आउँछ त्यसपछि प्रतिपक्षी दलको धर्म निभाउने कामको सुरुवाता बडो जोडतोडका साथ हुन्छ । त्यही समाचारले देशभरी एकफेरो लागेपछि सामाजिक सञ्जाल पनि रनक्कै तात्न थाल्छ ।
आज गभर्नर नियुक्त भए डा विश्व पौडेल, कांग्रेसको कोटाबाट । धेरैजस्तो पछिल्लो समयको सत्ताका प्रमुख दुई दलको लफडा गभर्नरमा पुगेर अड्किएको देखिएको थियो । सत्तमा देखिने संकटको प्रमुख कारक पनि यही थियो । तर आज टुंगियो ।
अब केही समय यताका लागि त्यस्तो झगडाको बीउ केही देखिँदैन । बरु प्रमुख निर्वाचन आयुक्तसँगै अरु पनि केही संवैधानिक पदमा रिक्त भएको पदका लागि चर्चा सुरु हुन भने सक्दछ । त्यसयताका लागि अहिलेलाई सत्ता संकटको पछिल्लो किस्ता बन्द भएको छ । नयाँ नयाँ किस्ताहरुको हिसाब किताब तय हुँदै जानुपूर्व अहिलेका लागि प्रमुख दुई दलीय संकट टरेको देखिएको छ ।
