गण्डकी। गण्डकी प्रदेश प्रमुख डिल्लीराज भट्टले युवाको शारीरिक तथा सामाजिक विकासमा खेलकुदकाे याेगदान महत्त्वपूर्ण रहेको बताउनुभएको छ ।
कास्कीको माछापुच्छ्रे गाउँपालिका-६ मा आयोजित तेस्रो रनिङ शिल्ड प्रतियोगिताको आज उद्घाटन गर्दै उहाँले यस्ता प्रतियोगिताले दूरदराज गाउँबाट खेलाडी उत्पादन गर्न सहयोग पुग्ने विश्वास व्यक्त गर्नुभयो ।
खेलकुदमा युवा सहभागिताले शारीरिकसँगै सामाजिक रूपमा सबल बनाउने बताउँदै उहाँले यसले आत्मसम्मान, सामाजिक सीप विकासका साथै नेतृत्व र क्षमताको पनि विकास गराउने धारणा राख्नुभयो । खेलकुदको सकारात्मक प्रभावले युवाहरूको शरीर र दिमाग दुवैको विकासमा योगदान पुर्याउने भएकाले यसको विकास र सम्वर्द्धन जरुरी रहेको उहाँको भनाइ छ ।
खेल क्षेत्रको विकास राष्ट्र विकासको महत्त्वपूर्ण आधार भएको उल्लेख गर्दै प्रदेश प्रमुख भट्टले यसको विकासबाट राष्ट्रको सर्वाङ्गीण विकासको ढोका खोल्न सकिने धारणा राख्नुभयो । खेल क्षेत्रमा लगानी वृद्धि गर्ने, खेलाडीको आत्मस्वाभिमान, प्रोत्साहन, पुरस्कारका साथै वृत्तिविकासमा थप योगदान गर्ने, राज्यको भूमिकालाई थप प्रभावकारी र जिम्मेवार बनाउन सरकार प्रयत्नशील रहनुपर्ने उहाँले बताउनुभयो ।
माछापुच्छ्रे-६ का वडाध्यक्ष टेकनाथ गौतमको अध्यक्षतामा भएको कार्यक्रममा माछापुच्छ्रे गाउँपालिकाका प्रशासकीय अधिकृत केशव सुवेदी, सन्देश अधिकारीलगायत कर्मचारी र जनप्रतिनिधिले धारणा राख्नुभएको थियो । रासस
