काठमाडौँ । भारत र पाकिस्तान युद्धविराम गर्न सहमत भएका छन् । यो दाबी अमेरिकी राष्ट्रपति डोनाल्ड ट्रम्पले गरेका हुन् ।
डोनाल्ड ट्रम्पले भने, ‘अमेरिकाको मध्यस्थतामा हिजो राति लामो छलफल पछि, मलाई यो जानकारी गराउन पाउँदा खुसी लागेको छ कि भारत र पाकिस्तान तत्काल र पूर्ण युद्धविरामको लागि सहमत भएका छन् । म दुवै देशलाई ज्ञान र समझदारीपूर्ण निर्णय लिएकोमा बधाई दिन्छु ।’
अर्कोतर्फ, भारतीय केन्द्र सरकारले भविष्यमा भारतमा कुनै आतंकवादी आक्रमण भएमा त्यसलाई युद्धको कार्य मानिने बताएको छ । आक्रमणको जवाफ पनि त्यसैगरी दिइने उसको भनाई छ । समाचार एजेन्सी एएनआईले सरकारी स्रोतहरूलाई उद्धृत गर्दै यो समाचार दिएको हो ।
अमेरिकी विदेशमन्त्री मार्को रुबियोले बुधबार राति पाकिस्तानका प्रधानमन्त्री शाहबाज शरीफ र भारतीय विदेशमन्त्री एस जयशंकरसँग कुराकानी गरेका छन् । उनले दक्षिण एसियामा शान्ति स्थापना गर्न दुवै देशलाई तनाव कम गर्न र मिलेर काम गर्न अपील गरे ।
अमेरिकी विदेश मन्त्रालयका प्रवक्ता ट्यामी ब्रुसले भने कि मार्को रुबियोले पहलगाममा भएको आतंकवादी हमलामा ज्यान गुमाउनेहरूका लागि फोन कलको क्रममा जयशंकरप्रति समवेदना व्यक्त गरे । उनले आतंकवाद विरुद्ध अमेरिका भारतको साथमा रहेको बताए । यद्यपि, उनले भारतलाई आक्रमणको लागि पाकिस्तानलाई दोष लगाउने र बदलाको माग गर्ने कुरामा सतर्क रहन सल्लाह दिए ।
यसैबीच, ट्यामी ब्रुसले प्रधानमन्त्री शरीफसँगको फोन वार्तामा रुबियोले पाकिस्तानलाई अप्रिल २२ मा कश्मीरमा भएको आक्रमणको निन्दा गर्न र अनुसन्धानमा सहयोग गर्न आग्रह गरेको बताए । अमेरिकी विदेशमन्त्रीले पाकिस्तानी अधिकारीहरूलाई यस आक्रमणको अनुसन्धानमा पूर्ण सहयोग गर्न अनुरोध गरेका थिए ।
