काठमाडाैंः सत्तारूढ नेपाल कम्युनिष्ट पार्टी (नेकपा)को सचिवालय बैठक शनिबार अपरान्ह ३ बजे प्रधानमन्त्री निवास बालुवाटारमा बस्ने भएको छ ।
पार्टीभित्र देखिएको विवाद समाधान र समसामयिक राजनीतिबारे बैठकमा छलफल हुने एजेन्डा रहेकाे छ । नेकपाले स्थायी कमिटी बैठक स्थगन गरेर आज सचिवालय बैठक बोलाइएको हो ।
गत असार १० गतेबाट जारी रहेको नेकपाको पाँचौ स्थायी कमिटी बैठक पार्टीको आन्तरिक विवाद मिलाउन पटक पटक स्थगन हुँदै आएको छ । शुक्रबार डाकिएको स्थायी कमिटी बैठक आइतवारसम्मका लागि स्थगन गरिएको छ ।
प्रचार विभाग उपप्रमुख सूर्य थापाले सचिवालय बैठक अघि अध्यक्षद्वय केपी शर्मा ओली र पुष्पकमल दाहाल प्रचण्डबीच भेटवार्ता हुने जानकारी दिनु भएकाे छ ।
यसअघि नेकपाका अध्यक्षद्वय र वरिष्ठ नेता माधव कुमार नेपालबीच भएका पछिल्ला बैठकहरूमा प्रधानमन्त्रीकाे राजीनामामा केन्द्रित भए पनि प्रधानमन्त्रीले राजीनामा दिन अस्वीकार गरेपछि नेकपाका बैठकहरू लम्बिनेक्रम जारी छ ।
